Ish-Presidenti i Republikës, Bujar Nishani, shprehet se hyrja e Sali Berishës në Parlament, nuk do të ndikojë marrëdhëniet mes Partisë Demokratike dhe Shteteve të Bashkuara të Amerikës.
“SHBA nuk i përkthen problemet që mund të ketë një individ i caktuar në kolektivizime masive, siç mund të ishte ndaj PD. PD është e madhe. Është një aset kombëtar. Sot PD është përfaqësimi i 620 mijë njerëzve që e kanë votuar të paktën në zgjedhjet e fundit”, tha Nishani në një intervistë për News24.
Po ashtu, Nishani hedh akuza mbi Bashën dhe Ramën kur thotë se interesi i tyre është të mbajnë si çështje të ditës debatin që është krijuar për Sali Berishën. “Përfituesi më i madh për ta zhvendosur debatin, nga problematikat e vërteta te Sali Berisha është Lulzim Basha. Natyrisht edhe Edi Rama, ai ka interesat e veta se ka një përballë një opozitë të përçarë, një opozitë të mjegullt. Një opozitë të pasigurtë”, u shpreh ish-Presidenti.
Nishani ka sfiduar publikisht kreun e PD-së, duke i kërkuar të mbajë qëndrim publikisht mbi këtë çëhstje, ndërsa theksoi se Basha duhet të jetë transparent me çështjen e Sali Berishës.
“Zoti Basha kurrë nuk i ka thënë opinionit publik nëse ka pasur apo nuk ka pasur qëndrime nga ana e administratës amerikane para vendimit për djegien e mandateve të deputetëve. Nëse ka pasur, cili ka qenë shqetësimi i amerikanëve? As për bojkotin e zgjedhjeve, Basha nuk ka bërë kurrë transparencë, as për opinionin, por as për forumet më të larta të Partisë Demokratike”, u shpreh ndër të tjera Bujar Nishani.
