Qyteti i Elbistanit në provincën e Kahramanmaraş me 142 mijë banorë ka pësuar dëmet më të mëdha nga tërmetet e fuqishme që goditën Turqinë dhe Sirinë ditën e hënë.
Aktualisht, ky qytet është i pushtuar nga gërmadhat e ndërtesave, ku të pakta janë ato që kanë mbetur ende në këmbë. Mediat në Turqi kanë vënë me “shpatulla pas muri” ekspertët, sipas të cilave ata kanë gabuar rëndë me deklaratat e tyre që mund të kenë marrë shumë jetë njerëzish.
Sipas “El-aziz”, nga tërmeti i parë 7,8 rihter i raportuar fillimisht, i cili sipas autoriteteve në Turqi tashmë është fiksuar në 7,7 rihter, janë shembur vetëm 4 godina. Ndërkohë, pas këtij tërmeti, portalet shkruajnë se ekspertët mbushën hapësirën në televizione duke u shprehur se nuk parashikohet të ketë një tjetër tërmet më të fuqishëm se magnituda 6 e shkallës rihter.
Por nuk ndodhi kështu. 9 orë nga tërmeti i parë, e njëjta zonë u godit nga një tjetër tërmet i fuqishëm, i cili u raportua fillimisht si 7,5 i shkallës rihter, ndërsa më pas u saktësua në 7,6 rihter. Në atë kohë, shumë persona në këtë qytet ishin rikthyer në shtëpitë e tyre të dëmtuara nga tërmeti i parë. Goditja e dytë e fuqishme ishte vrastare.
Aktualisht është vlerësuar se në këtë qytet janë shkatërruar totalisht 600 ndërtesa. Edhe Orhan Tatar, drejtori i Përgjithshëm i Rrezikut dhe Reduktimit të Tërmeteve të AFAD, i ka vlerësuar dy tërmetet e fuqishme në një periudhë të shkurtër kohë si të paprecendentë teksa dha detaje në një konferencë për shtyp.
Sipas “Yeni Şafak”, qendra e qytetit të Elbistanit është shkatërruar totalisht. Në rrugën kryesore të qytetit, “Hacı Esat Efendi”, nuk ka mbetur më thuajse asnjë ndërtesë në këmbë. Shumica e ndërtesave të shkatërruara janë nga 5 deri në 8 kate. Ndërsa në terren aktualisht janë me mijëra anëtarë të grupeve të kërkim-shpëtimit, më shumë se 2 mijë tenda janë ngritur vetëm në këtë qytet për të strehuar qytetarët që kanë mbetur pa shtëpi.
Discussion about this post