Gabriel Escobar pritet të vizitojë Kosovën

Siç citohet të ketë thënë në një telefonatë që ka zhvilluar dje me kryeministrin i Kosovës Albin Kurti, i dërguari i Shteteve të Bashkuara për Ballkanin Perëndimor, Gabriel Escobar pritet të vizitojë së shpejti Kosovën. Kështu thuhet në komunikatën për media të publikuar nga zyra e kryeministrisë. 

“Në mbyllje të bisedës, duke theksuar se pret që së shpejti të vizitojë Kosovën, z.Eskobar shprehu urimet më të mira për kryeministrin dhe popullin e Kosovës. Kryeministri falënderoi z. Eskobar për rolin dhe angazhimin e tij në Kosovë dhe rajon duke i uruar sukses në punën e tij dhe duke i ofruar bashkëpunimin e plotë të qeverisë së Republikës së Kosovës”, thuhet në komunikatën e ZKM-së.

Zv.ndihmës sekretari amerikan i Shtetit për Evropën dhe Euroazinë, Gabriel Escobar, ka shprehur mbështetjen e tij që të ketë progres në dialogun midis Kosovës dhe Serbisë.

“Escobar theksoi mbështetjen e Shteteve të Bashkuara për sovranitetin dhe integritetin territorial të Republikës së Kosovës dhe përkushtimin e SHBA-së që Kosova dhe rajoni të bëhen anëtare të Bashkimit Evropian. Në lidhje me dialogun në Bruksel, ai shprehu mbështetjen e tij dhe përkushtimin që të ketë progres në këtë drejtim”, thuhet në njoftimin e publikuar nga zyra e Kurtit.

Në njoftim thuhet se, ndër të tjera, Kurti e ka falënderuar Escobarin për mbështetjen e vazhdueshme të SHBA-së ndaj Kosovës.