Gafa e deputetes së PS, Shqipërinë e konsideron Republikë Popullore

Kohë leximi: 3 min

Në Parlament shpesh jemi mësuar të dëgjojmë batuta nga më të ndryshmet, sharje e akuza, por jo më pak edhe gafa.

Në seancën e fundit të sesionit parlamentar, përpara se ligjvënësit të nisin zyrtarisht pushimet, nuk kishte si të mos mungonin përplasjet, por edhe perlat që ata që konsiderohen si “ajka” e shtetit lëshojnë herë pas here.

Këtë rradhë ishte deputetja socialiste Lindita Buxheli që teksa po fliste për ligjin mbi studentët e mjekësisë, të cilëve iu ndalohet largimi nga Shqipëria për 5 vjet, pas përfundimit të studimeve, e quajti Shqipërinë një Republikë Popullore.

Ndoshta po të vazhdonte edhe pak, duke e quajtur Republika Popullore Socialiste, deputetja Buxheli mund të na kujtonte deputetet e PPSH-së, bie fjala shoqen Lenka apo shoqen Themie.

“Çdo i ri ka të drejtë dhe është përballë zgjedhjes të nënshkruaj kontratën e lidhur mes tre institucioneve, ministrisë së Arsimit të Shëndetësisë dhe Universitetit Mjekësor të Tiranës, që pas përfundimit të studimeve të punojë në Republikën Popullore të Shqipërisë”, u shpreh Buxheli.

Pritet që në sesionin e ardhshëm të dëgjojmë nga foltorja se si kjo Republika Popullore të konsiderohet fanar ndriçues për Botën dhe nuk është çudi që nga korri i deputetëve të dëgjojmë “lart më lart o shokë, flamujt e kongresit….”.