Kryeministri Edi Rama ka firmosur sot Vendimin e Këshillit të Ministrave për t’ia hequr nga pronësia Galerinë e Arteve bashkisë së Tiranës duke e kaluar nën përgjegjësinë e Ministrisë së Kulturës e cila drejtohet nga Mirela Kumbaro. Vendimi ka ardhur në një moment që çeshtja e Inceneratorëve po djeg stof politik nga Partia Socialiste.
Lidhja me këtë vendim përforcohet nga fakti se në Kongresin e Partisë Socialiste figurat politike të cilat kanë qënë të përfolura për përfshirje në aferën e Inceneratorëve nuk folën në Kongres, si zëvendëskryeministri Arben Ahmetaj dhe kryetari i bashkisë Tiranë Erion Veliaj. Por Veliaj përvec mundësisë për të folur tashmë ka humbur dhe Galerinë e Arteve e cila i jepte mundësinë për të shkëlqyer me një nga stolitë e rralla të kryeqytetit, të cilat pas rënies së Teatrit nën presionin e kullave të larta janë duke u rralluar.
Galeria e Arteve mesa duket i ka shpëtuar dorës së Veliaj për të prekur cdo gjë që është historike në kryeqytet ku vitin e kaluar me anë të Këshillit Kombëtar të Territorit (KKT) i cili drejtohet nga kryeministri Rama, u miratuan dy leje të cilat do të zhvilloheshin nga Ministria e Kulturës, në zonën qendrore të Tiranës.
Në këto leje përfshihesh Muzeu Kombëtar i Arteve të Bukura dhe rinovimi i sallës së Koncerteve në Universitetin e Arteve.
Edhe pse detajet e projektit për ndërhyrjen në ish-Galerinë e Arteve nuk janë sqaruar, ato lënë hapësirë jo vetëm për rikonstruksion, por edhe shtesë në këtë vepër. Në listën e gjatë të vendimeve të firmosura përfshihen edhe disa objekte arsimore në Tiranë, sikundër edhe një godinë e re për Institutin e Policisë Kërkimore.
Discussion about this post