Deputetja e LDK-së në Kuvendin e Kosovës, Ganimete Musliu, ishte sot pjesë e protestës në sheshin “Skënderbej” në Tiranë, ku qytetarë nga Shqipëria dhe Kosova kërkuan lirimin e krerëve të Ushtrisë Çlirimtare të Kosovës, të cilët po gjykohen në Hagë.
Musliu theksoi se protesta është një zë i drejtësisë kundër padrejtësisë, dhe se shqiptarët duhet të jenë të bashkuar përtej politikës kur bëhet fjalë për historinë dhe dinjitetin kombëtar.
“Kur bëhet padrejtësi, duhet të flasë populli. Populli shqiptar sot po flet për padrejtësinë që po u bëhet krerëve të UÇK-së në Hagë. Heronjtë tanë nuk kanë bërë krime – ata kanë mbrojtur tokat tona. Krimet i ka bërë Serbia,” deklaroi ajo.
Deputetja e LDK-së u bëri thirrje të gjitha forcave politike që të lënë pas ndasitë dhe të rreshtohen në një zë për UÇK-në, të cilën e cilësoi “mbi çdo parti dhe mbi çdo interes personal.”
“Madhështia e kësaj proteste është se Ushtria Çlirimtare e Kosovës është mbi çdo parti politike. Prandaj sot, më lejoni ta falënderoj përzemërsisht edhe kryeministrin shqiptar Edi Rama, i cili ka qenë kundër kësaj gjykate që nga fillimi,” u shpreh Musliu, duke vlerësuar mbështetjen e tij ndaj UÇK-së.
Në fund të fjalës së saj, Musliu tha se pa Ushtrinë Çlirimtare, nuk do të kishte as liri, as bashkim në sheshe, as përqafim mes shqiptarëve, duke theksuar se pjesëmarrja në protesta është detyrim moral dhe kombëtar për çdo shqiptar.
Discussion about this post