Demokratët në Këshillin Bashkiak të Tiranës kërkojnë prej muajsh shkarkimin e kryebashkiakut Erion Veliaj, për shkak të mungesës së tij të gjatë në detyrë. Sipas tyre, procesi është i vonuar, pasi një peticion zyrtar për këtë çështje është dorëzuar prej tre muajsh.
Ndërkohë, Ilir Alimehmeti, këshilltar dhe figurë e njohur opozitare, ka ngritur shqetësimin se mënyra se si po kryhet ky proces, me ndërhyrjen direkte të kryeministrit Edi Rama, përbën një shkelje të hapur të ligjit. Ai thekson se Veliaj duhet të ketë të drejtën të dëgjohet në mbledhjen e së martës në Këshillin Bashkiak.
“Ligji duhet respektuar. Çdo proces shkarkimi duhet të ndjekë rrugën institucionale dhe Veliaj ka të drejtë të mbrohet,” deklaroi Alimehmeti.
Pavarësisht kritikave për ndërhyrjen e mazhorancës, Alimehmeti nuk kurseu as vetë opozitën, duke theksuar se ka pasur vonesa në adresimin e kandidaturës së saj për Tiranën. Ai theksoi se zgjedhjet e parakohshme janë një realitet tashmë, por opozita duhet të veprojë me urgjencë dhe bashkëpunim.
“Duhej të ishim mbledhur më herët për të diskutuar emrin tonë. Ka figura me mbështetje, si Jorida Tabaku që doli më e votuara, dhe duhet të ketë konsensus,” tha ai, duke shtuar se ai vetë është i gatshëm për garën vetëm në vitin 2027.
Sipas tij, për të përballur me sukses PS-në në Tiranë, PD duhet të bashkëpunojë me të gjitha partitë opozitare dhe të krijojë një alternativë të fortë për qytetarët.
Discussion about this post