Ditën e sotme ka nisur procesi për zgjedhjet e kryetarëve të degëve në Partinë Socialiste. Lidhur me këtë proces fjalën e ka marrë kryeministri Edi Rama, i cili deklaroi se procesi duhet të jetë transparent dhe se kryetarët e rinj nuk duhet të jenë as njësh me kryebashkiakët dhe as në konflikt paralel me ta.
“Nuk duhet të lëmë në asnjë mënyrë që kryetarët e partisë në territor të jenë persona të pa politizuar ashtu siç duhet. Ne kemi larguar nga duart e partisë dhe influenca e partisë policinë e shtetit, trupën e mësuesve, kemi larguar trupën e infermierëve. Ne na duhen kryetarë partie që të jenë të gatshëm të përballen me njerëzit dhe për të mos e pritur përballje me njerëzit vetëm kur vjen deputetit.”
Gjithashtu, Rama ka deklaruar se duhet ti fitojnë zgjedhjet vendore që do të mbahen vitin e ardhshëm. “Duhet t’i fitojmë”
Së fundmi, kreu i qeverisë tha se do të ngrihet një Komision i Posaçëm Zgjedhor që do të bëjë përzgjedhjen. Sipas Ramës në këtë garë mund të marrin pjesë persona edhe nga jashtë forumit të Asamblesë Kombëtare, por nuk përjashtohen dhe vetë anëtarët e kësaj strukture.
Nga ana tjetër, lidhur me këtë situatë ka reaguar edhe Sekretari i Përgjithshëm i PS, Damian Gjiknuri, i cili inkurajoi çdokënd që mendon se ka aftësitë dhe vullnetin të bëhet pjesë e kësaj gare.
“PS po hyn në një fazë shumë të rëndësishme, faza e ripërtëritjes së saj sa i përket nivelit të drejtimit dhe të organizimit, pikërisht në një moment të rëndësishëm të Shqipërisë. Unë e kam thënë edhe më parë, jemi mandati i tretë, jemi shumë të avantazhuar, kemi shumë suksese por patjetër, partia ka nevojë për ripërtëritje dhe për vëmendje të shtuar.”
Ai nënvizoi se ky nuk është një proces thjesht për të zgjedhur vetëm një partiak.
Në fjalën e tij, Gjiknuri ironizoi dhe zgjedhjet e para pak ditëve në PD. Ai deklaroi se ndryshe nga opozita, gara në PS është e hapur.
Ndërkohë, ka folur lidhur me këtë situatë edhe kryetari i Bashkisë së Tiranës, Erion Veliaj, i cili në fjalën e mbajtur sot në takimin e Këshillit Koordinues të qarkut Tiranë, tha se falë mirëorganizimit dhe koordinimit në çdo degë të saj, sot Partia Socialiste është forca më e pathyeshme e më solide në Republikën e Shqipërisë.
“Të gjithë presin që Shqipëria të performojë më mirë, Shqipëria të ngrihet më lart, Shqipëria të transformohet, por koncepti i kombit është një koncept abstrakt.”
Discussion about this post