Ish-Kryeministri Sali Berisha ka nisur sot fushatën për zgjedhjen e kryetarit të ri të Partisë Demokratike. Ai ka zhvilluar takimin e parë sot në qytetin e Elbasnit, nga ku iu ka kërkuar qytetarëve të besojnë më shumë se PD do të ringrihet. Më tutje gjatë fjalës së tij, Berisha u shpreh se të gjithë së bashku duhet të punojmë që Shqipëria të mos pakësohet dhe të mos poshtërohet ashtu si ka ndodhur deri më tani. Sakaq, ai tha se PD do të ketë fokus që të mbajë të rinjtë në vend dhe të reduktojë emigrimin e tyre.
“Shpreh kënaqësinë e madhe që jam sot këtu te ju në një grup të rinjsh të cilët më së shumti simbolizojnë atë që duhet të jemi ne nesër dhe në të ardhmen tonë. Atë që synon PD që Shqipërinë ta bëjmë siç i kanë ëndrrat këta të rinj të shkolluar që punojnë për vendin. Unë kam ardhur sot para jush pas një turi të gjatë disa mujor. Kemi diskutuar bashkë probleme të shumta.
Ne së bashku e dimë diagnozën. I njohim problemet. Gjithnjë kam menduar dhe mendoj nga t’ia nisim për të ndryshuar këtë shoqëri dhe këtë vend. Çfarë duhet të bëjmë për të realizuar qëllime që vendi të mos pakësohet kështu si po pakësohet. Dhe të mos poshtërohet kështu si po poshtërohet. Vij tek ju me bindjen se ne duhet ta nisim nga dashuria për këtë vend dhe këta njerëz”, deklaroi Berisha. Ndërsa i bindur ai tha se PD po del nga kriza që e kishte përfshirë dhe tashmë po shkon drejt vendit që i takon.
Discussion about this post