Deputeti demokrat Besart Xhaferri ka treguar se do të ishte i gatshëm të garonte përballë kandidates së Partisë Socialiste, Ogerta Manastirliu, në zgjedhjet e ardhshme të Bashkisë së Tiranës.
Ndërsa ishte i ftuar në Klan News ai u pyet nëse do të ishte i gatshëm të garonte, Xhaferri u përgjigj: “Unë bëj çdo lloj sacrifice për demokratët kështu që patjetër që do e kisha nderin e jetës sime të garoj kur forumet e partisë vendosin që unë do jem fituesi. Kështu asnjë ndrojtje për këtë gjë.”
Megjithatë ai theksoi se Partia Demokratike ka rregullat e saj për përzgjedhjen e kandidatit, të bazuara dhe në statut. Sipas tij, e rëndësishme është të rrëzohet figura e Erion Veliajt dhe modeli i korrupsionit që sipas tij përfaqëson kandidatja socialiste, Manastirliu.
“Pastaj përsa i përket zgjedhjes së kandidatit të Partisë Demokratike, ne e kemi një procedurë dhe nuk shkon as për tekat e një kryetari apo tekat e një njeriu që do ta nxjerrë, por do i shkojë besoj një konsulte me të gjitha forumet e PD-së dhe asaj gare primare që kemi bërë gjithmonë dhe e kemi dhe pjesë të statutit.
Frikë nuk ka aspak për asnjë figurë të Partisë Demokratike që të garojë në këto zgjedhje. Është e vetmja gjë, një lloj maturie që të mos përshpejtojnë me nxjerrjen e kandidaturave të tyre, pa u dakordësuar se kush do të jetë figura më e mirë për të rrëzuar dhe ç’rrënjosur Erion Veliajn nga ajo bashki dhe për të mos instaluar nga fillimi një model korrupsioni siç e kemi parë në Ministrinë e Shëndetësisë dhe asaj të Arsimit.”, tha Xhaferri.
Kujtojmë se një ditë më parë, Erion Veliaj u shkarkua nga posti i kryebashkiakut me votim nga Këshilli Bashkiak i Tiranës. Ky vendim, pritet të miratohet nga Këshilli i Ministrave ditën e nesërme, e të hapet kështu rruga për zgjedhjet e Tiranës.
Megjithatë, Veliaj, ka të drejtë që të ankimojë vendimin e vulosur nga Këshilli i Ministrave tek Gjykata Kushtetuese, brenda 15 ditësh që nga momenti i miratimit.
Discussion about this post