Në dhunën e ushtruar ndaj familjes Kaçi në Hamallaj të Durrësit është përfshirë dhe punonjësi i gardës Martin Nikolli, i cili me detyrë dyshohet se është shofer i kryeparlamentares Lindita Nikolla.
Ditën e sotme Martin Nikolli, së bashku me vëllezërit e tij, i kanë zënë pritë dhe kanë goditur me shkopinj bejsbolli e mjete të forta familjen Kaçi, fqinj të tyre.
Konfirmimi për përfshirjen në konflikt të punonjësit të gardës bëhet nga vetë Policia, në një reagim zyrtar për ngjarjen.
Por ajo që të bie në sy në reagimin e policisë, është se pasi e pranon se punonjësi i gardës, Martin Nikolli ka qëlluar me armë, e zbut situatën duke shtuar se nga këto të shtëna nuk ka patur të lënduar.
Policia ka shoqëruar disa persona, dhe po vijon puna për zbardhjen dhe dokumentimin e plotë të rrethanave të konfliktit.
Si pasojë e dhunës janë plagosur 3 djemtë e familjes Kaçi, njëri prej të cilëve në kokë, ndërsa dy të tjerët janë në gjendje më të mirë. Pre e dhunës kanë rënë dhe gra e fëmijë.
Njoftimi i policisë
Hamallaj, Durrës/Informacion paraprak
Rreth orës 11:30, në Hamallaj, dyshohet se për motive pronësie, janë konfliktuar duke përdorur mjete të forta, anëtarët e një familjeje, shtetasit P. K., K. K. dhe S. K., me anëtarët e një familjeje tjetër, shtetasit A. N., P. K. dhe M. N.
Gjatë konfliktit dyshohet se shtetasi M. N., punonjës i Gardës, ka qëlluar në ajër, me armën e shërbimit. Nga të shtënat nuk është dëmtuar asnjë person.
Shërbimet e Policisë, sapo kanë marrë njoftim, kanë shkuar menjëherë në vendngjarje dhe kanë bërë të mundur shoqërimin e të gjithë personave të përfshirë në konflikt, në Komisariatin e Policisë Durrës.
Grupi hetimor vijon punën për zbardhjen dhe dokumentimin e plotë të rrethanave të konfliktit.
Në përfundim të veprimeve të para hetimore dhe procedurale, do të ketë njoftim të plotë.
Discussion about this post