Zëdhënësja e Partisë Demokratike, Floriana Garo tha sot se “ajo që po ndodh me fondet e rindërtimit në Durrës është një akt dhune ndaj taksapaguesve shqiptarë”.
Në një deklaratë për shtyp, Garo theksoi se “qeveria e Edi Ramës vazhdon të zhvasë pa mëshirë çdo qindarkë, duke e kthyer edhe rindërtimin në një mekanizëm përfitimesh personale dhe elektorale”.
“Rasti më i fundit i abuzimit është nga bashkia Durrës me rikonstruksionin e gjimnazit në Manzë. Për këtë shkollë, e cila ka nevojë vetëm për suvatime, lyerje e dyer të reja, dhe ndërtimin e një palestre, janë alokuar 3.15 milionë euro. Një rikonstruksion i tillë në vendet europiane, bashkë me palestrën, në standardet më të mira, nuk kushton më shumë sesa 1.2 milionë euro”, tha Garo.
Sipas saj, kjo dëshmon se fondet publike nuk shkojnë për përmirësimin e shkollave apo mirëqenien e qytetarëve, por pazare të errëta dhe tendera korruptivë.
“Partia Demokratike denoncon këtë krim ekonomik, këtë vjedhje të hapur, këtë lojë me fatkeqësinë kombëtare të tërmetit të vitit 2019. Ne garantojmë qytetarët se abuzimet me fondet e rindërtimit do të hetohen dhe ndëshkohen pa dallim. Ne sigurojmë çdo shqiptar se, në qeverisjen tonë, fondet publike do të përdoren për qytetarët, jo pushtetarët dhe për makinerinë e mashtrimit elektoral”, tha Garo.
Discussion about this post