Kombëtarja e futbollit kalon dhe testin e dytë miqësor dhe jep sinjale pozitive në prag të kampionatit europian që zhvillohet në Gjermani nga java e ardhshme.
Pas fitores ndaj Lihteinshtein, djemtë e Silvinjos kaluan me sukses edhe testin e dytë para se të udhëtojnë për në Gjermani, duke mundur me rezultatin 3-1 Azerbajxhanin këtë të premte në “Haladas Stadium” të Hungarisë.
Kombëtarja dominoi pjesën e parë që u mbyll me rezultatin 1-0, falë një goli me një goditje nga jashtë zone në minutën e 12-të nga Nedim Bajrami, i cili ishte një ndër më të mirët në fushë në ndeshjen e sotme.
Raste pati edhe Azerbajxhani, që shtoi presionin me fillimin e pjesës së dytë. Azerët u shfaqën disa herë kërcënues duke iu afruar barazimit, megjithatë portieri Strakosha u tregua në lartësinë e detyrës, duke bërë disa ndërhyrje vendimtare.
Vuajtjeve të kuqezinjve i erdhi fundi në minutën e 81-të teksa Rey Manaj shënoi pas një devijimi me një goditje nga brenda zone, duke finalizuar me festë aksionin e nisur nga mbrojtja, nga këmbët e Asllanit.
Gjashtë minuta më vonë, Gjazim Laçi tregohet i ftohtë brenda zonës dhe e çon avantazhin në 3-0.
Në fund të takimit, azerët shënuan golin e nderit pas një goditje standarde.
Me dy fitoret në testet miqësore, Kombëtarja shkon me moral të lartë në Gjermani. Takimi i parë do të zhvillohet në Dortmund kundër Italisë. Më 19 dhe 24 Qershor, kuqezinjtë do të luajnë me Kroacinë dhe Spanjën.
***
****
Lexo edhe:
Sylvinho pas fitores: Nesër nisemi për në Gjermani, aty fillon puna e madhe
Discussion about this post