Shkarkimi i trajnerit Ilir Daja nga drejtimi i skuadrës së Partizanit është lakuar shumë ditët e fundit për shkak të rezultateve zhgënjyese me të kuqtë. Për të sqaruar pozicionin e trajnerit Daja ka folur presidenti i skuadrës Gaz Demi në emisionin “Skaner”. Ai ka theksuar se trajneri ka besimin e plotë të tij dhe se do të vazhdojë në krye të ekipit edhe nëse humbet derbin me Tiranën. Kreu i klubit kryeqytetas komentoi vigjiljen e përballjes me rivalët e përjetshëm si dhe u ndal tek kompleksi i ri i klubit.
“Ne kemi bërë një akord me Dajën. Unë nuk jam specialist teknik. Jemi në fillimin e garës. Partizani i ka humbur pikët vetë, për shkak të gabimeve. Nuk ka asnjë problem mes presidentit dhe drejtorit. Olsi Rama merret më shumë me ekipin. Unë po punoj për dhuratën e madhe për tifozët, si kompleksi dhe akademia.
Përveç meje, Daja e ka përkrahjen e drejtorit. Futbolli është si familje. Nuk ka asnjë ftohje mes Partizanit dhe Dajës si trajner. Edhe mua nuk më pëlqeu ndeshja me Kukësin, por të tjerat kanë qenë pozitive. Daja nuk ka asnjë problem. Nuk ka përçarje mes klubit dhe trajnerit, këtë duhet ta kenë të qartë të gjithë. Nuk heq kollaj njeri unë nga Partizani.
Kam thënë njëherë se sa të jem unë, Tiranës nuk i ecën me Partizanin. E mira është që ne të fitojmë, por edhe po nuk fituam, nuk është ndonjë çudi e madhe. Presioni është pak më i madh te ne, sepse na duhen pikët. Shpresoj që në derbi të kemi edhe pak fat. Ne nuk kemi pasur fat fare deri tani. Kompleksi do të jetë gati në mes të nëntorit”, përfundoi Gaz Demi.
