Qëndrimi i Bashkimit Europian në lidhje me situatën në veri të Kosovës është kritikuar ashpër nga gazeta austriake “Der Standard”, madje ajo ka komentuar dhe postimet e kryediplomatit të BE-së, Josep Borrell, për të cilat shprehet se ato janë aq tronditëse sikur t’i ketë shkruar Beogradi.
Në shkrim thuhet se BE, nëpërmjet reagimit të saj, e përkeqësoi edhe më tepër situatën. Sipas tyre Kryediplomati i BE-së Josep Borrell, nuk e përkrahu shtetin ligjor kosovar, por kritikoi policinë kosovare për shkak të ‘masave të pakoordinuara’. Më tej, “Der Standard” shkruan se Josep Borrellit, postimet ia shkruan Beogradi.
“Me sa duket, atij po ia shkruan Beogradi postimet në Twitter dhe po beson se na qenkësh kompetent për të mbrojtur kriminelët”, thuhet në shkrim.
Ndër të tjera shkruhet se në aksionin e policisë, vetëm një nga të arrestuarit ishte serb, duke treguar pra se ky aksion kishte si qëllim kapjen e kriminelëve e jo diçka tendencioze ndaj Serbisë.
“Incidentet e dhunshme në veri, të ndalen menjëherë! Veprimet e njëanshme dhe të pakoordinuara që vënë në rrezik stabilitetin janë të papranueshme. Të gjitha çështjet e hapura duhet të adresohen përmes dialogut të ndërmjetësuar nga BE-ja. Ne jemi në kontakt me Prishtinën dhe Beogradin”, shkruante Josep Borrell në “Twitter”, në lidhje me situatën e shkaktuar.
“Përballë këtyre përpjekjeve të koordinuara për destabilizim, BE nuk po përgjigjet me refuzim të qartë, por po e përkeqëson situatën edhe më keq”, shkruan më tej “Der Standard”.
