Shqipëria është destinacioni sekret i edicionit të radhës të nismës “Let’s Get Lost”, ku 150 influencues dhe gazetarë nga Varshava kanë mbërritur në Tiranë.
Pjesëmarrësit u nisën pa e ditur destinacionin e udhëtimit dhe vetëm pas mbërritjes zbuluan se aventura e tyre do të zhvillohej në Shqipëri.
Gjatë katër ditëve, ata do të njihen nga afër me kulturën, historinë, kuzhinën, natyrën dhe mikpritjen shqiptare. Përvojat e tyre pritet t’i ndajnë me ndjekësit dhe lexuesit përmes rrjeteve sociale, por edhe mediave tradicionale.
Me mbështetjen e Aeroportit Ndërkombëtar të Tiranës, nisma synon ta prezantojë Shqipërinë te publiku polak dhe të rrisë interesin për vendin si destinacion turistik.
Manjola Kaso, Drejtore e Zhvillimit të Biznesit të Aviacionit dhe Marketingut në Aeroportin Ndërkombëtar të Tiranës, u shpreh se prania e gazetarëve dhe influencuesve nga Polonia përbën një mundësi për t’ua prezantuar Shqipërinë audiencave të reja përmes përvojave të drejtpërdrejta.
“Shpresojmë që kjo aventurë t’u japë pjesëmarrësve një njohje të veçantë të vendit tonë dhe të përcjellë më tej bukuritë, kulturën dhe mikpritjen shqiptare”, tha Kaso.
Discussion about this post