Duke folur mbi raportin e DASH për Shqipërinë, gazetari Armand Shkullaku, thotë se raporte të ngjashme kanë treguar se Shqipëria ndodhet në vendin e fundit ose të parafundit me Bosnjen, lidhur me klimën e të bërit biznes në Shqipëri apo investime.
Shkullaku tha se DASH ka bërë raporte më të tmerrshme më parë, por ai ngriti dyshime mbi faktin se sa vlerë kanë këto raporte për të ndryshuar realitetin në Shqipëri.
Pavarësisht se qeveria miratoi Ligjin e Investimeve Strategjike, gazetari Shkullaku theksoi dështimin në këtë sektor, për shkak se vendi ynë nuk ka njohur asnjë investim të tillë, përpos atyre turke…
Por Shkullaku nuk e kurseu ironinë ndaj kryeministrit Rama, kur tha se pronat në Shqipëri janë të Kristaq Ramës, e si të tilla, ai ka të drejtë t’i ndajë sipas dëshirave që ia njeh ligji.
“Duhen ndarë vlerat statistikore të këtij raporti, dhe fakt është që Shqipëria, referuar dhe raporteve të organizmave të huaj, ose është në vend të fundit ose parafundit me Bosnjen. DASH ka bërë raporte të tmerrshme dhe më parë, por sa vlerë kanë për të ndryshuar realitetin në Shqipëri.
Në Shqipëri fakt është që veç kompanive të Erdoganit që hyn vetë ose me emra të tjera, siç ishte tuneli i Llogarasë apo Vlorës, ndaj s’ka pasur kompani serioze. Ligji i investimeve strategjike u miratua në parlament, që qeveria shqiptare të kishte prioritet investimet në turizëm.
Meqë Shqipëria është Maldivet e botës, e të tjerët po shkulin flokët për të ardhur këtu… së paku duhet të lehtësojmë investimet strategjike. Edhe pse kemi këtë ligj, s’e kemi sot asnjë investitor, zero që të ketë investuar në Shqipëri.
Ajo që DASH i referohet, ka të bëjë me faktin që Shqipëria s’garanton me ligj të drejtën e pronës, ose nesër i teket Ramës të nxjerr vëllain pronar.
Nëse ke një konflikt ligjor, gjykatat e kanë zgjidhur me ato që i paguan më shumë…
Pronat në Shqipëri janë të Kristaq Ramës që i biri i ka trashëguar dhe i ndan sipas dëshirave të veta që ia njeh ligji sipas asaj që ka trashëguar”, u shpreh ai.
Discussion about this post