Skandalet vijojnë gjithnjë e të shtohen në spitalin Onkologjik në QSUNT ku trajtohen pacientët me sëmundje tumoriale. Pavarësisht denoncimeve të shumta, nuk ka asnjë reflektim nga Qeveria dhe Ministria e Shëndetësisë, të cilët janë të fokusuar vetëm tek propaganda dhe jo shërbimi ndaj qytetarëve.
Gazetari Osman Stafa, i cili ka bërë denoncime të forta për situatën në këtë spital, i është drejtuar ditën e sotme me një letër të hapur Edi Ramës, ku i bën me dije se gratë me kancer gjinekologjik presin me shpresën që të ndizet dhe të punojë pajisja (brakiterapia) për t’i ndihmuar në luftë me jetën.
Përmes një postimi në rrjetet sociale, Stafa i kujton Ramës shpenzimet 4.3 milionë euro për kopshtin Eden në Kryeministri apo 6 milionë euro për satelitët “Albania 1 dhe 2”. Gazetari i kërkon më tej Ramës që të paktën një herë ta vendosë prioritetin tek jeta dhe jo tek fasada dhe luksi.
Postimi i plotë:
LETËR E HAPUR KRYEMINISTRIT Edi Rama
Zoti Kryeministër,
Ndërsa ju shëtisni përmes kopshtit “Eden” që u ndërtua për 4.3 milionë euro brenda godinës së Kryeministrisë, vetëm pak kilometra më tej, në Spitalin Onkologjik, gratë me kancer gjinekologjik presin me shpresën që një pajisje (brakiterapia) të ndizet, të punojë. Ajo s’është në funksion, pasi s’është kryer proçesi i mirëmbajtjes.
Ajo pajisje të ndihmon të luftosh për jetën z. Rama. Po, për jetën. Ajo fjalë që nuk mbillet si pishat e palmat me kosto prej 8 milionë eurosh, që u hoqën e u thanë, me zgjerimin e rrugës Tiranë-Durrës.
Ju që hodhët në orbitë 6 milionë euro për dy satelitë që, deri më sot, nuk kanë parë as kancerin, as korrupsionin, e as skamjen, a do ta ktheni ndonjëherë vështrimin tokësor? Se në tokë po rrezikojnë të shkojnë drejt fatalitetit, gra.
E kuptojmë, ndoshta brakiterapia nuk është për foto instagrami e nuk të jep sharmin e palmave, as sfondin për story, por është më e vlefshme se çdo gjeth i kopshtit tuaj publikuar në facebook.
Të paktën një herë, vendosni prioritetin tek jeta. Jo tek luksi. Jo tek fasada.
Discussion about this post