Gazetari serb, Rade Radovanoviç ka folur për RTV Dukagjini dhe për qëndrimin e tij pro kosovar.
Ai ka thënë se në librin e tij, kishte shkruar për masakrat që kishin ndodhur në Kosovë nga shteti serb dhe se nuk pret rregullim të marrëdhënieve Kosovë-Serbi, përderisa në krye të shtetit të Serbisë është Presidenti Aleksander Vuçiçi.
“Nga Dritarja e thyer e hedhin edhe një bombë… prap shpërthim… edhe më shumë tym e barut… dhe heshtja thuajse jehon… Tymi i mbulon trupat e vdekur.. e vranë edhe Eronin, edhe Redonin, edhe Drilonin, edhe Ismetin… edhe Fatimen, edhe Avdiun dhe të birin e tyre Kushtrimin… edhe Lirijën shtatëzënë e burrin e saj Nexhmedinin… i vranë të gjithë Berishët në picerinë Kalabria… e kishin kryer detyrën e marr… Ashtu besonin!”, janë disa nga fjalët në librin e autorit serb Rade Radovanovic i cil është dhe gazetar.
Këto rreshta janë vetëm një nga shumë raste që gazetari serb Rade Radovanovic ka shkëputur nga lufta e fundit në Kosovë e i ka përmbledhur në librin e tij “Qeshja nën trekëmbëshin e varjes”.
Ai ka treguar që ky libër ishte refuzuar nga pesë botues në Serbi. Gjithashtu, ka treguar që libri i tij ishte injoruar nga mediat serbe.
“Ka pasur serb që e kanë lexuar librin tim por ka qenë edhe e injoruar shumë nga mediat serbe sepse këtu mediat janë të kontrolluara nga Presidenti, Aleksander Vuçiq. Unë personalisht e kam më të lehtë të heshti këtu sesa ta pranoj atë se çfarë kam shkruar. E të gjithë ata serb që besojnë në atë çfarë kam shkruar unë, ata duhet të mos tejkalojnë të vërtetën e jo të thuhet që Kosova është Serbi sepse akoma po luhet politikë por unë mendoj që politikes shumë shpejt do t’i vjen fundi”, ka theksuar, Rade Radovanoviç.
Radovanovic foli edhe për krimet e Serbisë të kryera në Kosovë.
“Unë kam shkruar në librin tim për masakrat që kanë ndodhur në Kosovë. Jam munduar të përfshijë dokumentime për këto masakra. Unë besoj që shumë njerëz e din se çfarë ka bërë Serbia. Kanë ndodhur vrasje brutale në Kosovë, ka pasur shumë fëmijë të vrarë, gra e burra. Për fat të keq ata që i kanë ditur shifrat e këtyre krimeve më nuk janë gjallë”, ka shtuar ai.
Gazetari i guximshëm serb poashtu, beson që marrëdhëniet Kosovë- Serbi është e vështirë të rregullohen përderisa president i Serbisë është Aleksandar Vuçiq.
“Nuk jam i lumtur për marrëdhëniet ndërmjet dy shteteve. Vuçiçi nuk din asgjë tjetër të thotë pos që Kosova është Serbi. Duhet të jesh politikanë i mirë për të gjetur një gjuhë të përbashkët”, ka thënë Radovanoviç.
Ndër të tjera gazetari serb, Radovanoviç ka theksuar se i gjithë tirazhi i librit të tij të përkthyer në Gjuhën Shqipe është shitur prandaj tregoi që është duke punuar që ky tirazh të rritët./RTVD
Discussion about this post