Nga Lutfi Dervishi
20 shkurt! Ora 20:23! Ura e Elbasanit mbushur me policë. Mbi 100 forca! Rreth 30 gazetarë dhe kameramanë! Dy makina ujehedhese! Asnje protestues!
Shpërthime që pasohen nga re tymi gazlotsjelles! Era frynte në drejtim që dëmtonte më shumë policinë. Viktimat e parë të gazit. Qindra besimtare po faleshin brenda dhe në ambient të hapur të xhamia Namazgjase! Mes tyre dhe gra dhe fëmijë. Kalimtare dhe turistë në zonë me shami në fytyrë…
Pse duhet të dislokohen dhjetera policë pranë xhamisë?
Pse përdoret gaz kur dihet që gaz lotsjellës kur nuk ke askënd përballë përveç gazetareve?
20:26: Një protestues i vetëm afrohet me vrap drejt policose dhe në një distancë 50 m hedh molotov!
Nuk përdoret uji – por shtohet gazi lotsjellës!
Nëse kërkon të dish Pse? Kur? Ku? Si dhe sa perdoret gazi lotsjellës – mjaftojnë pak minuta kërkim.
Edhe në mungesë të internetit logjika thotë që gazi lotsjellës përdoret si mjet i fundit dhe kur ke përballë një turmë (jo një grusht njerëzish) që nuk i menaxhon dot ndryshe!
Gazi lotsjellës nuk përdoret si mjet parandalimi!
Por në atë orë dhe në atë vend policia nuk kishte turmë përballë!
Standardet janë të qarta. Forca përdoret kur është e nevojshme dhe në masën e nevojshme.
Ata që kanë planifikuar dhe dhënë urdhër për perdorimin e gazit lotsjellës duhet të jenë vetë në terren dhe të kuptojnë që nuk bëhet fjalë për deodorant! (Edhe deodoranti perdoret me masë se shkakton probleme në lëkurë dhe te sytë!)
Gazi lotësjellës është mjet reaktiv, jo pro aktiv, është mjeti fundit dhe jo i pari. Është për përdorim në situatë ekstreme dhe jo mjet disiplinimi në distancë për çdo situatë të tensionuar. Kur përdorimi bëhet si ai i mbrëmshmi, kur prek persona të pambrojtur, kur hidhet pa hesap, atëherë nuk flasim më për menaxhim turme, por për krim!
Raporteri Special i OKB për Torturën ka theksuar se përdorimi i mjeteve kimike për shpërndarje turmash mund të përbëjë trajtim çnjerëzor ose degradues nëse përdoret në mënyrë disproporcionale, në hapësira të mbyllura, ose pa kriter.
Po ashtu hedhja e molotovëve ndaj policisë është krim. Sulmi ndaj policit është i papranueshëm. Policia mbron të drejtën për protestë, jo të drejtën për djegie.
Megjithate forca e policisë nuk matet me sa gaz përdor por me vetëpërmbajtje, proporcionalitet dhe profesionalizëm.
Kur nuk menaxhon 20 protestues – pa krijuar re kimike mbi besimtare dhe kalimtare për çfarë drejtuesish policie dhe standartesh policore flasim?!!
(Kush ka drejtuar operacionin e mbrëmshem te policisë qartësisht ka një koncept tjetër për protestën, për policinë dhe për mënyrën se si përdoret dhuna. Ndoshta formimi si oficer tankesh e bën të mendojë se përballë nuk ka një protestues, por nje armik që duhet azgjesuar)
Drejtimi politik i policisë minimumi duhet të hetojë drejtuesin dhe zinxhirin komandues për gazin lotsjellës!
Është koha për t’i kërkuar ndjesë jo vetëm besimtarëve që faleshin, por banorëve, kalimtarëve dhe turistëve për përdorimin pa asnjë kriter të gazit lotsjellës.
Por në vend të faljes publike pamë tallje publike!
Kryeministri poston xhaminë e Namazgjase të mbuluar me re tymi! Të paktën nuk tha që gazin lotsjellës e ka hedhur opozita!
Discussion about this post