Sekretari i Përgjithshëm i PD, Gazment Bardhi, ka bërë sot një sërë deklaratash të forta që lidhen me situatën brenda Partisë Demokratike. Gjatë një interviste televizive, ai ka mohuar që Lulzim Basha të ketë deklaruar se do të ketë përjashtime në PD. Sipas tij, Basha vetëm ka kujtuar se ata që bëjnë veprime në dëm të partisë nuk kanë vend aty dhe këtë e përcakton statuti.
Ndërsa ka folur për detyrat që statuti i PD i dikton çdo kujt, Bardhi tha se Berisha është i pari që shkel rregulloren edhe pse e njeh më mirë se të gjithë atë. “Ka ndodhur një keqkuptim nga mbrëmë. Nuk ka patur dhe nuk do të ketë përjashtim. Ka patur sqarim të kryetarit për vendimin e Kryesisë dhe pikës 3 të këtij vendimi që flet për akte dhe vendime që dëmtojnë interesin elektoral apo politik të PD. Ndjej keqardhje gjatë këtyre ditëve kam parë z.Berisha që është një nga njohësit më të mirë të statutit, për shkak të karrierës së tij në PD, të shkelë statutin, të shpallë ilegjitime çdo strukturë të PD që nuk i nënshtrohet bindjeve, opinioneve apo lëvizjes së tij”, u shpreh ai.
Sakaq, Bardhi akuzoi se Berisha ngriti me qëllim “Foltoren” që të shkelte statutin dhe rregulloren e brendshme të Partisë Demokratike. “Ka patur gjatë gjithë kësaj periudhe një shkelje konstante të statutit. Kam parë zotin Berisha të nisë një lëvizje për çështjen e respektimit të statutit nga strukturat e PD, të nisë një betejë për demokratizimin e mëtejshme të PD e cila është një gjë pozitive. Por në përfundim të kësaj lëvizje, veçanërisht gjatë ditëve të fundit, kemi parë nga një lëvizje për demokratizimin e PD, për respektimin e statutit të PD, u shndërrua në një lëvizje që injoron statutin e PD, injoron forumet e PD”, tha ai. Ndërsa theksoi se, përjashtimi i një anëtari të PD nuk është kompetencë e kryetarit të partisë.
Discussion about this post