Gazment Bardhi, i cili vijon të njihet si kryetar i Grupit Parlamentar të PD-së nga shumica e deputetëve demokratë, edhe pse është shkarkuar nga funksionet nga Lulzim Basha, ka thirrur një tjetër takim të deputetëve, i 3-ti ky që nga momenti kur ai inicoi një tryezë me kolegët që qëndrojnë prej dy vitesh në krah të Sali Berishës.
Raportohet se Bardhi ka thirrur mbledhjen e grupit parlamentar ditën e martë, por ajo nuk do të mbahet as në kryesinë e Kuvendit dhe as në selinë e PD-së, por në Kukës.
Në 24 shtator, kuksianët do të votojnë për kreun e ri të bashkisë, në zgjedhjet e pjesshme vendore, ku përballë qëndron kandidati Emri Vata, i mbështetur nga “Bashkë Fitojmë” dhe Albert Halilaj i PS-së.
Duket se me mbledhjen në Kukës, ku pritet të jetë i pranishëm edhe ish-Kryeministri Sali Berisha dhe deputetët që e mbështesin atë, do të jepet mesazhi për një bashkim të demokratëve në përballjen me socialistët për Bashkinë e qytetit.
Pritet që në zgjedhjen e 24 shtatorit, të gjithë deputetët që tashmë janë të ndarë në atë që njihet si grupimi Berisha dhe Bardhi, të jenë prezent në Kukës. Në anën tjetër, PD e vulës që drejtohet nga Lulzim Basha, përveçse ka të drejtën e propozimit të dy komisionerëve, ashtu sikundër e vendosi Kolegji Zgjedhor, nuk ka asnjë kandidat për kryebashkiak dhe nuk pritet të jetë aktive në zgjedhje.
Discussion about this post