Kryetari i grupit parlamentar të Partisë Demokratike, Gazment Bardhi, ka reaguar ashpër pas deklaratave të qeverisë mbi vrasjen tronditëse të gjyqtarit Astrit Kalaja në ambientet e Gjykatës së Apelit në Tiranë. Ai akuzon Kryeministrin dhe Ministren e Brendshme për manipulim të qëllimshëm të së vërtetës, duke fshehur përgjegjësinë e Policisë së Shtetit në sigurinë e institucioneve gjyqësore.
Bardhi thotë se deklaratat e qeverisë pas ngjarjes janë gënjeshtra të rënda dhe dizinformim publik, të bëra për të mbuluar paaftësinë institucionale dhe papërgjegjshmërinë që çuan në këtë tragjedi.
“Kryeministri foli për roje private, ndërsa Ministrja e Brendshme pretendoi se Policia nuk ka përgjegjësi për sigurinë në gjykata. Të dy gënjyen publikisht, me qëllim fshehjen e rolit të Policisë në dështimin tragjik të ruajtjes së rendit,” – deklaron Bardhi.
Ai përmend dokumente zyrtare të Këshillit të Lartë Gjyqësor (KLGJ) që zbulojnë se, sipas legjislacionit aktual dhe vendimeve të Këshillit të Ministrave, Policia e Shtetit ka detyrimin ligjor për të garantuar sigurinë në gjykata dhe për kontrollin e hyrje-daljeve.
Bardhi thekson se në Gjykatën e Apelit, punonjës të Policisë së Shtetit janë vazhdimisht të pranishëm dhe kryejnë kontrolle edhe ndaj deputetëve, por kjo nuk ndodhi në rastin e autorit të vrasjes.
“Pamjet filmike dëshmojnë qartë se autori nuk u ndalua nga policia, por vetë kërkoi të arrestohej, duke thirrur punonjësit e rendit,” – shton Bardhi, duke hedhur poshtë versionin zyrtar të ngjarjes.
Ai shpreh shqetësim të thellë për korrespondencën midis KLGJ-së dhe Policisë, ku, sipas tij, Ministria e Brendshme ka refuzuar të përmbushë detyrimet ligjore për shkak të mungesës së burimeve njerëzore, ndonëse ishte e njoftuar për rrezikun në rritje ndaj trupës gjyqësore.
Për Bardhin, kjo përbën jo vetëm papërgjegjshmëri politike, por edhe penale. Ai bën thirrje për dorëheqjen e menjëhershme të Ministrit të Brendshëm, ndërsa u kërkon prokurorëve të SPAK të nisin hetime për shpërdorim detyre ndaj ministrave dhe drejtorëve të Policisë që nga viti 2023 e në vijim.
“Jemi përballë një akti të rëndë që ka tronditur opinionin publik dhe ka ekspozuar rrënimin e plotë të shtetit. Kur një gjyqtar vritet në detyrë dhe qeveria gënjen për të larë duart nga përgjegjësia, është momenti për veprim ligjor, institucional dhe moral – jo për heshtje e manipulime,” – përfundon reagimin e tij Bardhi.
Ngjarja e rëndë dhe reagimet që pasuan po nxisin tension të madh politik, ndërsa institucionet hetimore ndodhen nën presion për të nxjerrë në dritë të vërtetën dhe për të vendosur përgjegjësitë ligjore.
Discussion about this post