Deputeti i Partisë Demokratike, Gazment Bardhi ka deklaruar mbrëmjen e sotme se nuk kishte sesi të përfshiheshin në një proces si votimi i kryetarëve të degëve sepse ishte një proces që kishte nisur me kohë pa u konsultuar me ta.
Gjithashtu, përsa i përket Kuvendit të datës 30 Prill, Bardhi është shprehur se fakti që pjesa më e madhe e deputetëve të grupit parlamentar nuk kishin marrë pjesë tregonte se ishte një farsë.
“Ku të shkonim? Procesi e para kishte nisur. E dyta në pjesën dërrmuese, ishte drejt përfundimit dhe ishte totalisht pa transparencë, ku nuk ishin përfshirë anëtarët e grupit parlamentar të PD-së. Nëse ti organizon zgjedhjet për kreun e PD, shembull në Fier aty duhet të kesh edhe deputetët e këtij qarku. Nuk mund t’u thuash atyre në fund ejani në Kuvend pas një procesi ku nuk morën pjesë fare.”
Nga ana tjetër, Bardhi e ka mbyllur fjalën e tij duke thënë se në momentin kur diçka nuk e besojnë nuk duhet të shkojnë si tufë dhe sipas tij ekziston edhe një pjesë tjetër të kryesuar nga Berisha të cilës nuk i intereson as bashkimi dhe asgjë tjetër, përveç kontrollit të PD-së.
“Nuk mund të shkonim si tufë tek diçka ku nuk besojmë. Ka edhe një pjesë tjetër e kryesuar nga Berisha të cilës nuk i intereson as bashkimi dhe asgjë tjetër, përveç kontrollit të PD-së për ta përdorur për interesa personale. Pjesë e kësaj farse nuk kam ndërmend të bëhem. Faktet treguan se pjesa më e madhe e grupit parlamentar nuk morën pjesë në këtë lloj farse”.
Discussion about this post