Në ditën e 86-të të protestës kundër qeverisë dhe kryeministrit Edi Rama, eksperti i IT-së Gent Progni bëri thirrje që zëri i qytetarëve të dëgjohet edhe në institucionet evropiane, duke kërkuar mbështetjen e partnerëve ndërkombëtarë për kërkesat e protestuesve.
Progni tha se kërkesa për dorëheqjen e kryeministrit Edi Rama mbetet kusht i panegociueshëm i protestës. Sipas tij, marrja e vendimeve të gabuara nuk mund të pasohet vetëm nga korrigjimi i tyre, por duhet të shoqërohet edhe me përgjegjësi politike.
“Kemi edhe një kusht të panegociueshëm, dorëheqjen. Sepse, nëse ke marrë vendime të gabuara që i kanë kushtuar vendit, nuk mjafton t’i korrigjosh, duhet të mbash edhe përgjegjësi. Përgjegjësia politike ka një emër, dorëheqje”, deklaroi Progni.
Progni iu drejtua edhe partnerëve ndërkombëtarë, duke u kërkuar që të tregojnë kujdes në marrëveshjet afatgjata që lidhen me qeverinë shqiptare.
“Tregoni kujdes me marrëveshjet afatgjata lidhur me qeverinë e Edi Ramës. Kjo protestë ka treguar se ekziston një krizë e thellë besimi dhe legjitimiteti politik. Një Shqipëri e lirë dhe me institucione që përfaqësojnë qytetarët do të kërkojë transparencë dhe do të rishikojë çdo marrëveshje që cenon interesin kombëtar dhe pasuritë publike”, u shpreh ai.
Progni: Sot zëri ynë duhet të dëgjohet deri në Bruksel dhe Parlamentin Evropian. Për 86 ditë po protestojmë paqësisht dhe demokratikisht, me një mesazh të qartë, Shqipëria nuk është në shitje. Kërkojmë shfuqizimin e ligjeve që cenojnë interesin publik dhe pasuritë kombëtare, ligjin për zonat e mbrojtura dhe Paketën e Maleve.
Kemi edhe një kusht të panegociueshëm, dorëheqjen. Sepse, nëse ke marrë vendime të gabuara që i kanë kushtuar vendit, nuk mjafton t’i korrigjosh, duhet të mbash edhe përgjegjësi. Përgjegjësia politike ka një emër, dorëheqje.
Partnerëve tanë ndërkombëtarë e evropianë duhet t’u them diçka me më shumë përgjegjësi. Tregoni kujdes me marrëveshjet afatgjata lidhur me qeverinë e Edi Ramës. Kjo protestë ka treguar se ekziston një krizë e thellë besimi dhe legjitimiteti politik.
Një Shqipëri e lirë dhe me institucione që përfaqësojnë qytetarët do të kërkojë transparencë dhe do të rishikojë çdo marrëveshje që cenon interesin kombëtar dhe pasuritë publike. Nuk jemi kundër partnerëve të Shqipërisë, përkundrazi, kërkojmë prej tyre që të qëndrojnë përkrah shqiptarëve, jo të një qeverie të përkohshme.
Ne e kemi zgjedhur Evropën dhe e duam këtu, me ligj, me drejtësi dhe me përgjegjshmëri. Kërkesat tona janë të qarta, shfuqizim të ligjeve, përgjegjësi për vendimet e marra dhe dorëheqje. Sepse Shqipëria nuk shitet, nuk falet, është e shqiptarëve.
Discussion about this post