Projekt idetë janë pjesë që merr miliona euro nga portofoli i investimeve për rrugët, ku shtohet edhe “talenti” i drejtorëve të ARRSH në vite për të bërë tendera korruptivë. Një nga këto prokurime ka për objekt “Studim Projektim Rruga e Bregut”, që ka nisur në verën e vitit të kaluar, ndërsa kontrata është firmosur ditët e fundit. Me këtë rast, drejtorit Gentian Gjyli i është akorduar “Flamuri i kuq” nga Open Data Albania. Kjo është shenja e riskut të korrupsionit, ndërsa në krah të saj qëndron përshkrimi: “Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”.
Tenderi e ka fondin limit afro 1 milion euro me TVSH, prandaj janë rreshtuar 12 kompani dhe bashkime operatorësh për të marrë pjesë në konkurrim.
Procedura e hapur më 16 gusht 2024 do të përfundonte më 18 shtator 2024 pa kurrfarë konkurrimi, sepse komisioni i Gjylit do t’i eliminonte të gjithë pjesëmarrësit duke i shpallur ofertat të pavlefshme me “kleçka” dhe interpretime të kritereve që do të ngelnin në klasë edhe studiot e nivelit botëror. Nuk kemi ç’bëjmë, do vuajmë sa të instalojë Kryeministri Rama, siç ka premtuar, Inteligjencën Artificiale në vend të komisioneve të prokurimit të Gjylit me shokë, që i bien qylit me buxhetin e shtetit!
Rezultati i këtij procesi është se fiton oferta më e shtrenjtë, ndërsa ofertat më të ulëta vlerësohen me më pak pikë.
Siç mund të shihet nga dokumenti, diferenca mes ofertës fituese të paraqitur nga Bashkimi i operatorëve ekonomikë P.C.S.COMPANY – “BALILI KONSTRUKSION – 2H-Construction – HYDRO-ENG CONSULTING dhe pjesëmarrësve të skualifikuar qysh në fazën e parë, është me dhjetëra milionë lekë më tepër. Kontrata me fituesin është nënshkruar më 3 mars 2025, për shkak se drejtor Gjyli nuk e ka problem as vonesën, as transparencën me publikun.
Ankesa në KPP
Një pjesë e pjesëmarrësve në tender kanë zgjedhur të marrin pjesë formalisht, duke mos dorëzuar dokumente ose pa paguar sigurimin e ofertës. Por ka pasur kompani që kanë luftuar deri në KPP që të kualifikoheshin, ndërsa Gjyli nuk është tërhequr, duke mos e ndryshuar vendimin e tij për fituesin.
Kështu, “ITM” shpk kërkoi në Komisionin e Prokurimit Publik shfuqizimin e vendimit të ARRSH, pasi nuk i ishte dhënë e drejta të korrigjonte aplikimin para njoftimit për skualifikimin.
Në datë 14 janar 2025, Komisioni i Prokurimit Publik mori vendimin “Të pranojë pjesërisht ankesën e paraqitur nga operatori ekonomik “ITM” Shpk për procedurën e prokurimit me objekt: “Studim Projektim, Rruga e Bregut”, me fond limit 81,950,902. Lekë pa TVSH, zhvilluar në datën 18 shtator 2024”. ARRSH u urdhërua të kryejë rivlerësimin e procedurës së mësipërme.
Sigurisht që Gjyli e zbatoi formalisht vendimin dhe më 30 janar 2025, KPP i hapi dritën jeshile ARRSH-së që tenderi të shkonte tek fituesi i mëparshëm.
Kush janë përfituesit e çekut?
Ndërsa pjesëmarrësit e tjerë kaluan në vrimën e gjilpërës për “kriteret”, kompanitë fituese të çekut të për Rrugën e Bregut nuk i përmbushin kërkesat e tenderit. Kështu, “2H-Construction” shpk me pronar Hekuran Hoxhallin, sipas kontrollit që bëmë në QKB, nuk ka depozituar akoma pasqyrën financiare të vitit 2023. Një nga kërkesat që duhet të përmbushin të gjithë pjesëmarrësit individualisht është dorëzimi i bilanceve të tre viteve të fundit.
Ndërsa, kompania tjetër pjesëmarrëse në bashkimin e operatorëve, “HYDRO-ENG CONSULTING” shpk shënon rekord në tendera se bëhet fituese pa pasur asnjë lloj licence.
Në këtë dokument tregohet se subjekti “HYDRO-ENG CONSULTING” shpk me pronar Evis Qyrkun, nuk ka asnjë lloj licence aktive , sipas kontrollit të bërë më 19 mars 2025. Kompania është marrë me kolaudim punimesh dhe supervizion.
Edhe kompania tjetër “2H-Construction” shpk nuk zotëron asnjë lloj licence sipas kontrollit të bërë sot në QKB.
Në përshkrimin e objektit të aktivitetit, duket se kompania është marrë me ndërtim, ndërsa në janar 2024 ka shtuar edhe aktivitetin e projektimeve dhe ekspertizës, si dhe mbikëqyrje punimesh.
Pjesëtarja tjetër në këtë bashkim operatorësh është “P.C.S.COMPANY” shpk me pronar Xhevair Aliun, që ka licencë III.2.A – Veprimtaritë e ekspertizës lidhur me ndikimin në mjedis. Ndërsa kompani e katërt, “BALILI Konstruksion” me pronar Engjëll Balilajn, nuk ka asnjë lloj licence aktive për momentin.
Edhe në CV profesionale kjo kompani numëron vetëm 1 projektim rruge, kur merrte pjesë bashkë me dy studio në ideimin e segmentit të shkurtër “Xhorxh Bush”, një kontratë e përfituar me firmën e kryebashkiakut Erion Veliajt më 2018.
Nuk është surprizë që fitojnë tenderin 1 milion euro këta biznesmenë, që nuk plotësojnë kualifikimet elementare, sepse kriteri i vetëm i drejtorit Gentian Gjyli është përfitimi.
Kujtojmë se drejtori i ARRSH-së, Gentian Gjyli është paraqitur në Prokurorinë e Posaçme (SPAK) mëngjesin e ftohtë të 14 janarit 2025. Ai ka qëndruar në SPAK për më shumë se 2 orë. Burimet bëjnë me dije se ai është thirrur për të dëshmuar mbi procedurat e ndjekura në tenderët e rrugëve, gjatë kohës që ai ishte numri 2 i ARRSH-së dhe drejtor Evis Berberi, në hetim nga SPAK nën masën e sigurisë ‘arrest me burg’.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post