Ish-ministri i Mbrojtjes, Fatmir Mediu, ka deklaruar pas daljes nga GJKKO se procesi për çështjen “Gërdeci” është ndërtuar në mënyrë të paligjshme dhe po kalon në akuza absurde.
Mediu u shpreh se ndaj tij po ngrihen akuza për çështje ushtarake, teksa u shpreh se “çdo ministër mbrojtje merr vlerësimin për çështjet ushtarake me ndihmën e strukturës ushtarake”.
“S’kam bërë shkollë ushtarake, çdo ministër mbrojtje merr vlerësimin për çështjet ushtarake me ndihmën e strukturës ushtarake. Struktura ushtarake kanë përgatitur urdhrin e ministrit në raport me kalibrat, është edhe një komision. Më falni kë duhej të pyesja unë, të merrja shefin e shtabit të SHBA-ve ta pyes se çfarë më ka thënë shefi i shtabit të FA-ve, qëndron apo jo? Ky proces është ndërtuar në mënyrë të paligjshme dhe po kalon në akuza tërësisht absurd dhe të pabaza. I them ministrit të sotëm të mbrojtjes, edhe ish-ministrave duhet patjetër të mbrojnë shkollën ushtarake përpara se të marrin postin sepse mund t’i akuzojnë për çështje ushtarake që kanë të bëjnë me kalibrat, me llojin e armatimit dhe municioneve, transportin e tyre, duhet patjetër ta dinë. Ky nuk është standard i NATO-s, por i prokurorisë sonë”, deklaroi Mediu pas seancës së sotme.
Brenda gjykatës, Mediu ka vijuar të kundërshtojë përgjigjet e dhënë nga ekspertët që kanë përpiluar akt-ekspertimin ekonomiko-financiar, të paraqitur nga SPAK si provë në proces. Nga banka e të pandehurit, ish-ministri i akuzuar për “shpërdorim të detyrës”, ka këmbëngulur se kompania SAC, që kreu demontim në Gërdec kishte kaluar në të gjithë filtrat e DASH, por edhe të MEICO e SHISH. Sipas Mediut, ekspertët nuk kanë këqyrur 80% të dokumentacionit të nevojshëm për të kryer akt-ekspertimin dhe as me licencat që zotëronte SAC, të miratuara nga autoritetet amerikane.
“Do hedh dritë mbi çdo përgjigje dhe sens alogjik të ekspertëve. Në raporte e korrespondenca konfidenciale, Meico dhe SHISH kanë vërtetuar besueshmërinë e kompaninë SAC.Mbi 80% e dokumenteve të nevojshme nuk janë studiuar nga ekspertët. Ekspertët bëjnë vlerësime juridike, që janë jashtë tagrit të tyre. DASH nuk vlerëson një kërkesë, por të gjithë dokumentacionin. Ka shumë detaje para se të lejohet përcjellja e teknologjisë ushtarake në Shqipëri. Ekspertët i bëjnë bisht pyetjes edhe nëse janë njohur ose jo me licencat e SAC. Ekspertët nuk kamë asnjë njohuri se çfarë licencash nevojiten në SHBA dhe Shqipëri për këtë proces. Unë, duke kërkuar në dokumentacion, arrita të gjej disa licenca të SAC, licenca për të cilat është marrë në vijimësi leje nga SHBA. Departamenti i Mbrojtjes, por edhe i Transportit në SHBA kanë dhënë leje për procesin.
Nëse Sac do ishte kompani mashtruese, atëherë përse akuza nuk ka ngritur asnjë çështje ndaj kësaj kompanie. Pretendohet se nuk kanë paguar detyrimet financiare. Unë kam mundur të gjej të gjitha licencat e SAC. Ministria e Mbrojtjes nga vitet ‘90 deri sot, i ka shitur municionet në ofertuesin e parë. Municionet nuk mund të shiten në ankand. Ekspertët kanë bërë përgjigje “copy paste” të akt ekspertimit të bërë prej tyre në vitin 2008. Kam kontrata të Meico me Policanin, ku Meico e ia ka dhënë municionin falas dhe transportuar falas. Në Polican fishekët janë djegur. Janë shpenzuar 8 mln usd nga partnerët. Demontimi në Poliçan do të zgjaste deri në 2030, ndërsa kërkohej që procesi të mbaronte në 2010. Absurditet vlerësimi i ekspertëve që fitimi në rast demontimi është më i madh se ai nga shitja”, u shpreh Mediu.
Discussion about this post