Ardian Mullai, ish-Sekretari i Përgjithshëm i Ministrisë së Mbrojtjes, ishte dëshmitari i fundit, që dha dëshminë sot në GJKKO, lidhur me çështjen e Gërdecit.
Në pyetjen e prokurorit nëse ka pasur licencë SAC, dëshmitari u përgjigj: “ishin paraqitur licenca, 4 mesa mbaj mend. MEKO ishte shoqëria qe mbante kontaktet me kompaninë SAC përfshirë këtu edhe për licencimin”.
Prokurori e pyeti Mullain se si u përzgjodh Gërdeci, për të bërë demontimin, ndërsa Mullai tha se “në diskutimet me MEKO më duket kishte marrëveshje dypalëshe me SAC, ku mes të tjerash ishte përcaktuar si lokacion Gërdeci”.
I pyetur nëse kishte apo jo licencë reparti i Gërdecit, dëshmitari përgjigjet: “praktika e licencimit nuk varet nga sekretari. Në çdo praktikë që unë kam kaluar edhe në te shkuarën, nuk ishte në përgjegjësinë e sekretarit apo ministrit përcaktimi nëse licenca e një reparti ishte e duhur apo jo. Ishte MEKO që e përcaktonte”.
Lidhur me kompaninë AlbaDemil, një degëzim i SAC, nëse kishte dokumentacionin e duhur apo jo, ish sekretari i përgjithshëm i Ministrisë së Mbrojtjes, tha se marrëveshja përmendte vetëm SAC, nuk përmendej Alba Demil, nuk kam dijeni, sepse AlbaDemil nuk figuronte në asnjë shkresë.
“Nuk është bërë asnjë verifikim për shkak se nuk figuronte. Nuk e njoh as Mihal Deliorgjin (drejtuesin e kompanisë AlbaDemil)”, shtoi ai.
Ndërsa Fatmir Mediu, i cili po gjykohet lidhur me tragjedinë e ndodhur 15 vjet më parë, e pyeti ish-Sekretarin e Përgjithshëm, se kush e përcaktonte buxhetin, ministri apo shtabi?
“Ministria e Mbrojtjes kishte një veçori ne ndryshim nga ministritë e tjera, buxheti i të cilave përcaktohej nga Këshilli i Ministrave. Ndërsa në Ministrinë e Mbrojtjes, buxheti përcaktohej nga Shtabi i Përgjithshëm i Forcave të Armatosura”.
Ish-ministri e pyeti dëshmitarin nëse në takimin me kreun e SAC Patric Henry ka qenë prezent apo jo vetë ai dhe ai u përgjigj se nuk kishte qenë.
Ndërsa pyetjes nëse ndonjëherë municionet janë shitur me ankand ai u përgjigj negativisht.
Discussion about this post