Ministrja e Punëve të Jashtme dhe Diasporës, Donika Gërvalla, e ka cilësuar mundësin e anëtarsimit të Kosovës në Këshillin Evropian, si hapi më i rëndësishëm pas Pavarësisë. Gërvalla ka deklaruar se vendimi për aplikim për anëtarësim në këtë mekanizëm është marrë në kohën e duhur.
“Tani është koha për të marrë vendimet e duhura. Prandaj, edhe kemi vendosur qe ketë vendim të rëndësishëm ta marrim tani. Ne besojmë që ky është hapi i duhur në kohën e duhur. Nga anëtarësimi fitojnë të gjithë dhe nuk humbet askush, fitojnë qytetaret e Kosovës, fiton rajoni, fiton Këshilli i Evropës”, ka thënë Gërvalla në një konferencë për media.
Sipas saj, Kosova ka mbështetje të shumë shteteve anëtare të Këshillit Evropës.
“Kam biseduar me përfaqësues të ndryshëm të Bashkimit Evropian edhe të Francës, ne na është thënë qe Franca e mbështet anëtarësimin e Kosovës në Këshillin e Evropës. Nëse Franca ndërkohë mund të ketë ndonjë dilemë ne mund të bisedojmë por nuk kemi ndonjë informacion të tillë”, ka thënë ajo.
Gërvalla ka folur edhe lidhur me afatet kohore të anëtarësimit të Kosovës në KiE, duke thënë se është një proces i gjatë.
“Kjo procedurë për shtete të ndryshme ka zgjatur. S’mund të them a zgjatë 1 vit a 7 vjet, apo vetëm disa muaj”, është shprehur ajo.
Ajo ka thënë se zyrtarisht Kosova nuk ka pranuar asnjë informacion nga asnjë shtet se do të ketë tërheqje të njohjes së Kosovës.
“Ne nuk kemi asnjë informacion nga asnjë shtet, fakti që vetëm pak orë pas aplikimit të Kosovës për anëtarësim të Kosovës në Këshillin e Evropës ata (Serbia) thonë që i kanë gati katër çnjohje tregon dy gjëra ose lajmi është i pavërtetë ose ata kanë shumë kohë që punojnë për çnjohje për dallim nga ajo çka deklarojnë publikisht”, ka thënë Gërvalla.
Serbia pretendoi sot se janë gati 4 shtete që të tërheqin njohjet e shtetësisë së Kosovës.
Discussion about this post