Ministrja e Punëve të Jashtme dhe Diasporës në Kosovë, Donika Gërvalla, do të marrë pjesë sot në takimin e Komisionit të Partneritetit në nivel ministror të Kartës SHBA-Adriatik (A5), që po zhvillohet në Zagreb të Kroacisë. Lajmin e ka bërë të ditur vetë ministria përmes një postimi në faqen e saj zyrtare, në të cilon tregohet se pjesë e takimit do të jetë gjithashtu edhe i dërguar i posaçëm i SHBA, Gabriel Escobar.
“Pjesë e këtij takimi do të jenë ministrat e jashtëm dhe zyrtarë të lartë nga vendet anëtare të Kartës së Adriatikut dhe Zëvendës Ndihmës Sekretari i Shteteve të Bashkuara për Çështje Evropiane dhe Euroaziatike, njëherësh mbikëqyrës i politikave të vendeve të Ballkanit Perëndimor, Gabriel Escobar”, thuhet në njoftim.
Ministria tregon se, gjatë këtij takimi do të diskutohet lidhur me sfidat e sigurisë në Evropën Juglindore me theks të veçantë në proceset euroatlantike në rajon si dhe për bashkëpunimin në kuadër të kësaj karte.
Discussion about this post