Në Partinë Demokratike nuk ka garë, nga 2013 e këtej çdo garë ka ardhur në regres. Kështu u shpreh deputeti Lefter Gështenja në studion e Klan News, ndërsa theksoi se problem më i madh që ka sot PD është se askush nuk hap rrugën dhe s’ka një garë reale.
“Jemi në një situatë kur jemi bërë si Edi Rama që nuk bën zgjedhje në PS, ndërsa në PD bëhen gara jo reale.
Pse duhet të aplikojmë ne këto skenarë si Edi Rama? Unë jam i bindur që ka shumë intelektualë që duan dhe janë të gatshëm të japin kontribute, por kur s’ka garë nuk afrohen”, tha Gështenja.
Duke i bërë një skaner situatës në PD, Gështenja tha se problem serioz mbeten njerëzit që marrin poste drejtuese, apo hyjnë në Kuvend, pa asnjë meritokraci, i shohim në krye njëlloj sikur hipin në ashensor dhe ngjiten.
Gështenja tha se demokratët duhet të bëhen bashkë, unë mendoj se ekzistojnë mundësitë që PD të bëhet më e madhe se ajo që ishte në 2021.
“Duhet një ekip i ri, një frymë e re, duhen njerëz të rinj, nëse duam të fitojmë zgjedhjet në 2025. Nëse do të mbetemi këtu ku jemi atëherë do të shkojmë drejt 5 mandateve që do të thotë ose do të jemi në opozitë të përjetshme, ose do përdoren këto mandate në funksion të qeverisë, për interesa të ngushta personale”, tha Gështenja.
Lidhur me rezultatin e zgjedhjeve në Kukës, deputeti demokrat tha se sa herë ka pasur zgjedhje të pjesshme ato i ka fituar Qeveria, ndërsa për rezultatin në Kukës duhet të ketë njerëz përgjegjës.
Discussion about this post