Nëse iu kujton SPAK-un, kryebashkiakët e korruptuar vazhdojnë shpërdorimet pa pasur frikë burgun; Kur u thotë Rama se tenderat do t’i bëjë me Inteligjencë Artificiale, ata nxitojnë të manipulojnë më tepër sa pa ardhur roboti; kur u kujton se erdhën zgjedhjet, i shtojnë abuzimet se u duhen para për votat.
Një nga këta kryebashkiakë është Gëzim Topçiu, kryetar i përjetshëm i Bashkisë Maliq (i zgjedhur qysh nga viti 2000). Ai vazhdon të thyejë rekorde për tenderët abuzivë.
Tenderi i radhës ka vënë në risk një shumë të konsiderueshme dhe askush nuk ka marrë masa.
Bëhet fjalë për prokurimin me objekt ‘Sistemim asfaltim rrugë viti 2024’, me fond limit 625 milionë lekë. Duke llogaritur TVSH, ky fond kap shifrën 750 milionë lekë. Kur shohim këtë shumë të madhe logjika të çon se do të bëhet ndonjë investim madhor në gjithë Maliqin. Në fakt bëhet fjala për riparimin e disa segmente që në total përshkojnë 2.4 km rrugë.
Ky fond do të ishte i mjaftueshëm edhe nëse 2.4 km rrugë do të ndërtoheshin nga e para, ndërsa për riparimin e tyre me vetëm nga një shtresë asfalt, këto para me siguri teprojnë.
Topçiu e ka anashkaluar ligjin mbi prokurimet duke mos zhvilluar ndonjë garë, sepse nga 9 kompani që dorëzuan aplikimet, 8 prej tyre u fshinë me një të rënë të lapsi..
Pra, Topçiu i skualifikoi që në fazën e parë konkurrentët. “ALMO KONSTRUKSION”shpk dhe “VASHTEMIA” shpk + mbështetës “SALILLARI”shpk kishin oferta më të lira me vlerë 348 milionë lekë dhe 374 milionë lekë, por komisioni i Topçiut i ka skualifikuar nga gara me argumentin se kanë paraqitur ofertë “anomalisht të ulët”.
Në fakt, Topçiu e ka fryrë aq shumë fondin limit për këtë punë publike, sa çdo ofertë logjike në përputhje me tregun duket si anormale.
Në fund, mbi tryezën e Topçiut mbeti vetëm zarfi me ofertën e firmës “ RRUGA URA ASFALTIM NR.2 ELBASAN” sha me mbështetës “BE – IS” shpk dhe “BLERIMI”shpk, që kap vlerën 436 milionë lekë (Pa TVSH). Pra, biznesmeni Kujtim Hasa mori në dorë këtë super fond nga bashkia e vogël e Maliqit.
Pa konkurrentë përballë, me ofertën më të shtrenjtë, kjo firmë mori dhuratë kontratën nga Topçiu për një shtresë asfalt që do të hedhë këtë verë tek rrugicat e Maliqit.
Menjëherë Open Data Albania i ka vendosur tenderit “Flamurin e Kuq”, që tregon riskun e korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post