Pronarët e banesës ku jetonin me qira çifti i bashkëjetuesve, Jetlira Elezi dhe Ramis Mici kanë folur mbi ngjarjen tronditëse të ndodhur mëngjesin e sotëm në Elbasan.
Sipas dëshmisë së dhënë, e ndjera Jetlira Elezi që u vra thikë nga Ramis Mici, kishte marrë një urdhër mbrojtje nga policia pasi 4 ditë më parë e kishte denoncuar këtë të fundit për dhunë të ushtruar.
Mes të tjerash, pronari i banesës ku jetonin me qira, ka zbuluar se grindjet mes tyre kishin nisur ditët e fundit, ndërkohë përshkruan edhe momentin kur panë të pajetë 37-vjeçaren Jetlira Elezi.
“Një muaj kishin që jetonin këtu. Para 4-5 ditësh u grindën dhe e ndjera e denoncoi zotërinë në polici. Më pas erdhi policia këtu dhe e mori. Ajo zbriti nga kati i dytë ku po qëndronte dhe u vendos në katin e parë, i liruam një dhomë. Mesa na tha neve, policia i kishte dhënë urdhër mbrojtje. Mbrëmë nga ora 1 pa 10 kur doli ai nga dera, e kishte ndjerë gruaja ime. Kur zbrita poshtë, pashë që dera ishte hapur, u afrova e pashë që ishte gjak dynjaja, ajo kishte mbaruar. Kur hyra brenda pashë kufomën e kishte kthyer kurrizin nga dera dhe gjithë dhoma ishte bërë gjak”, u shpreh pronari i banesës.
Mësohet se e ndjera ishte e divorcuar dhe kishte një fëmijë nga martesa e mëparshme ndërsa prej 6 vitesh bashkëjetonte me Ramis Micin.
Discussion about this post