Situata në Partinë Demokratike sa vjen e tensionohet si pasojë e tentativave të protestuesve për të hyrë në selinë blu. Pasi kanë thyer dritaret dhe dyert, ata janë futur në korridorin e godinës, por janë hasur me dyert e mbyllura që nuk kanë mundur t’i thyejnë. Protestuesit kanë provuar forma të tjera për të hyrë në seli, ndaj disa prej tyre janë ngjitur përmes shkallëve në katin e dytë të godinës. Një nga protestuesit është lënduar dhe gjakosur, në rrethana që ende nuk dihen. Në deklaratën e tij pranë Berishës, ai u shpreh se është sulmuar nga policia e Bashës.
I menjëhershëm ka qenë dhe reagimi i Policisë së Shtetit, që ka mohuar përfshirjen në këtë konflikt dhe hedhjen e sendeve të paligjishme ndaj protestuesve.
“Sqarojmë opinionin publik se asnjë nga strukturat e Policisë së Shtetit të angazhuara për garantimin e rendit dhe sigurisë nuk është përfshirë në asnjë veprim dhe nuk ka hedhur asnjë send të kundërligjshëm në selinë e Partisë Demokratike, gjatë protestës që është duke u zhvilluar”, thuhet në njoftim.
Policia iu bën thirrje protestuesve që të distancohen nga aktet e dhunshme, teksa thekson se ka si objektiv mbrojtjen e tyre dhe ruajtjen e sigurisë qytetare.
“Policia e Shtetit është tërësisht e angazhuar për të garantuar rendin e sigurinë dhe u bën thirrje qytetarëve që të distancohen nga çdo akt dhune apo prishje e rendit dhe sigurisë, pasi do të përballen me forcën e ligjit”, mbyllet njoftimi.
Discussion about this post