Nënkryetari i Kuvendit të Shqipërisë, Agron Gjekmarkaj, ka reaguar ashpër përmes një deklarate për shtyp lidhur me zhvillimet e fundit në Parlament, duke akuzuar mazhorancën për shkelje të rëndë të normave demokratike dhe përpjekje për të heshtur opozitën.
“Ajo që po ndodh me Parlamentin e Shqipërisë është e paprecedentë dhe thellësisht shqetësuese. Kuvendi është marrë peng në mënyrë të qëllimshme, me synimin e qartë për të shmangur çdo debat të vërtetë politik,” – u shpreh Gjekmarkaj.
Sipas tij, mazhoranca po sillet me institucionin si me “pronë private”, duke refuzuar interpelancat, debatet dhe çdo formë të transparencës. Ai theksoi se ngjarjet e ditës së sotme në Kuvend nuk ishin spontane, por të provokuara qëllimisht për të penguar pyetjet e opozitës ndaj përfaqësuesve të institucioneve të drejtësisë.
“Fikja me dhunë e debatit, asgjësimi i të drejtës për të bërë pyetje, është një akt i rëndë kundër demokracisë – është dënim me vdekje i vetë parlamentarizmit,” deklaroi Nënkryetari i Kuvendit.
Ai i bëri thirrje Kryetarit të Kuvendit, Niko Peleshi, të sillet si përfaqësues i të gjithë qytetarëve shqiptarë, duke lënë mënjanë, siç u shpreh ai, rolin e “ushtarit të bindur të partisë”.
“Zoti Peleshi, është koha të silleni si Kryetar i Parlamentit të gjithë shqiptarëve. Ushtrinë e keni kryer me kohë. Tani keni detyrimin të mbroni demokracinë,” përfundoi Gjekmarkaj.
Deklarata vjen në një moment tensionesh të larta politike dhe përplasje mes mazhorancës dhe opozitës brenda Kuvendit, ku përfaqësues të institucioneve të drejtësisë pritet të raportojnë për çështje me interes të lartë publik.
Discussion about this post