Nënkryetari i Partisë Demokratike dhe parlamentit, Agron Gjekmarkaj i shoqëruar edhe nga kryetari i grupit parlamentar të PD-së, Gazment Bardhi po zhvillojnë një vizitë në Gjermani, ku kanë zhvilluar takime të shumta dhe në nivele të larta të Bundestagut.
Në një lidhje direkte nga Gjermania Gjekmarkaj u shpreh, se kanë informuar drejtuesit e Bundestagut dhe personalitete të tjera për arrestimin politik të kryetarit të PD-së, Sali Berisha.
“U pritëm së bashku me kryetarin e grupit parlamentar, Gazment Bardhi. I qartësuam për të gjitha zhvillimet që po ndodhin në Shqipëri. Pata rastin të ju tregoj me imtësi për procesin ndaj kryetarit të opozitës si një ngjarje tronditëse dhe themelore në jetën politike shqiptare.
Ju shpjegova rrethanat e arrestimit të tij, në shkelje të kushtetutës nenit 73 të saj.
E klasifikojmë me këtë rast liderin e opozitës si të burgosur politike.
Ngrita shqetësimet se ky është një precedent që ngre disa pikëpyetje në lidhje me reformën në drejtësi që ne e kemi mbështetur, e cila ka nevojë të monitorohet dhe përmirësohet sepse, siç ua shpjegova ka krijuar vonesa të mëdha për qytetarët.
Janë 125 mijë dosje që duan 25 vite për tu konsumuar. Që vendet vakant po mbushen që vijnë nga mbështetja politike e PS-së, duke krijuar një korporativëzëm brenda sistemit të drejtësisë dhe gjahut që po i bëhet opozitës shqiptare nga një pjesë e sistemit të drejtësisë.
Unë pashë një interesim të madh dhe kuptova se për shumë çështje në Shqipëri, ata janë të painformuar ose janë të informuar në mënyrë të njëanshme.
Mora një premtim që më duket shpresëdhënës që grupet faktmbledhëse nga Bundestagu mund të rikthehen në Shqipëri dhe ky është një zhvillim i drejtpërdrejtë” tha Gjekmarkaj.
Discussion about this post