Nënkryetari i Partisë Demokratike, Agron Gjekmarkaj ka reaguar pas humbjes së PD në zgjedhjet e pjesshme lokale duke dalë kundër qëndrimit të Lulzim Bashës.
Gjekmarkaj shkruan se çdo justifikim i dhënë për humbjen është i papranueshëm, referuar deklaratës së Bashës se humbja erdhi pasi qytetarët nuk votuan. Ndër të tjera, ai kërkoi edhe mbledhjen me urgjencë të organeve përkatëse të PD-së për të analizuar faktorët e humbjes.
“Në zgjedhjet e pjesshme të 6 Marsit, Partia Demokratike pësoi një humbje tronditëse duke tejkaluar çdo parashikim ogurzi. Përtej çdo rrethane kundër nesh, sado të dukshme e turpëruese, ne nuk mund të akuzojmë askënd pos vetes. Çdo justifikim është i papranueshëm! PD duhet të mbledhë sonte me urgjence organet e saj dhe të nxjerre përgjegjësitë që çuan në këtë katastrofë elektorale. Unë, prej dy muajsh jam njëri prej katër Nënkryetarëve të PD-së dhe jam i gatshëm të mbaj përgjegjësinë time. Nuk do t’i shmangem asaj për asnjë arsye apo interes që bie në kundërshtim me vullnetin e shoqërisë dhe parimet e mia etike,” shkruan Gjekmarkaj në Facebook.
Sot në një dalje publike, Lulzim Basha tha se nuk ka humbur asnjë garë në jetën e tij, ndërsa 6 palë zgjedhjet i quan si “masakra elektorale”, përballë të cilave PD nuk ka mundur të fitojë, përfshirë këtu edhe 6 marsin, ku PD doli forcë e tretë politike.
Discussion about this post