Deputeti i PD-së Agron Gjekmarkaj deklaroi sot se PD ka nevojë të bëjë një akt të madh historik, ndarjen nga Berishizmi si shoqëria nga enverizmi. Ai akuzoi Berishën si përgjegjësin kryesor për gjendjen që ndodhet PD sot.
“Përgjegjës mund të jetë shumëkush, por askush më shumë se Berisha. Do doja që ky Kuvend të analizojë vetveten. PD sot ka nevojë të bëjë një akt të madh historik. Ajo duhet të ndahet nga berishizmi siç u nda shoqëria nga enverizmi. Berishizmi sot është enverizmi i demokracisë. Nuk dua të them se ai është burimi i të gjitha të këqijave, nuk dua t’i mohoj betejat, duke mos e mohuar respektin, jam i shtrënguar të them sot se po sulmon trashëgiminë e tij më të mirë, po shkon aq larg sa ta sulmojë. Sali Berishës i shkonte për shtat pritja, duhet ta bënte për mijëra demokratë që e kanë ndjekur për vite. Mbi supet e tij mund të rrinte dhe një akt kaq tronditës sa shpallja non grata. Ai nuk la mundësi që ne të mallëngjeheshim dhe të prekeshim nga nostalgjia. Ai na ndau, bëri si gjithmonë”, deklaroi Gjekmarkaj.
Ai i bëri thirrje Bashës të ndërtojë modelin e tij të liderit dhe të marrë vendime të vështira për të mirën e partisë.
Discussion about this post