Nënkryetari i Partisë Demokratike, njëkohëshisht edhe nënkryetar i Kuvendit të Shqipërisë, Agron Gjekmarkaj ka zhvilluar një vizitë zyrtare në Suedi, ku është takuar me kryetarin e Kuvendit Andreas Norlen, nënkryetarin e Komisionit të Jashtëm Morgan Johansson dhe deputetin Fredrik Ahlstedt.
Në postimin e tij në Facebook, Gjekmarkaj thekson se shprehu mirënjohje për mbështetjen e Suedisë ndaj Shqipërisë në hapat që po ndjek në procesin e integrimit evropian, por shtoi se diskutuan gjithashtu edhe për shqetësimet kryesore që e pengojnë këtë proces.
Mes shqetësimeve, ai përmend edhe mbrojtjen që i bënë socialistët disa javë më parë ish zv kryeministres Belinda Balluku, të cilët, pavarësisht se SPAK kërkon arrestimin, ata nuk lejuan heqjen e imunitetit të deputetes.
Postimi i plotë:
Gjatë vizitës zyrtare në Suedi pata nderin të zhvilloj një takim me Kryetarin e Parlamentit, Sh.T.Z. Dr. Andreas Norlen, së bashku me Nënkryetarin e Komisionit për Punët e Jashtme, Z. Morgan Johansson dhe deputetin Z. Fredrik Ahlstedt.
Në emër të Partisë Demokratike dhe liderit të saj, Prof. Dr. Sali Berisha iu shpreha mirënjohjen e thellë për ndihmën e çmuar që Suedia i ka dhënë dhe vazhdon t’i japë Shqipërisë në rrugëtimin e saj drejt Bashkimit Evropian. Kryeparlamentari Dr. Norlen rikonfirmoi angazhimin e tij dhe të Parlamentit Suedez për të mbështetur anëtarësimin e plotë dhe të shpejtë të Shqipërisë në familjen europiane.
Gjatë këtij takimi diskutuam për disa nga shqetësimet kryesore që ngadalësojnë apo pengojnë integrimin në Bashkimin Evropian. Problematikat e thella të zgjedhjeve, veçanërisht linçimi politik i liderit te Opozites Sali Berisha, zgjedhjeve parlamentare të 11 Majit 2025, të reflektuara gjërësisht në raportin final të OSBE-ODIHR, ngushtimi i hapësirave dhe mohimi i të drejtave të opozitës në Parlament, presioni ndaj drejtësisë dhe mbrojtja politike e zyrtarëve të lartë nëpërmjet imunitetit parlamentar janë hapa pas në procesin e integrimit evropian.
Mikpritësit tanë theksuan rëndësinë e vazhdimit të reformave, respektimin e pavarësisë së pushtetit gjyqësor, si dhe dialogut konstruktiv në Parlament, duke respektuar rolin dhe të drejtat e opozitës parlamentare.
Një delegacion i Komisionit për Punët e Jashtme do të vizitojë Shqipërinë muajin e ardhshëm për të parë dhe diskutuar nga afër këto zhvillime.
Mirënjohje Kryetarit Dr. Norlen dhe kolegëve të tij për pritjen miqësore dhe diskutimet e hapura, në shërbim të forcimit të marrëdhënieve bilaterale ndërmjet dy vendeve tona, brenda familjes europiane.
Discussion about this post