Deputeti dhe kryetari i Komisionit për Edukimit dhe Mjetet e Informimit Publik, Agron Gjekmarkaj është takuar ditën e sotme me ambasadorin e OSBE në Tiranë Vincenzo Del Monaco dhe me Teresa Ribeiro, përfaqësuese e lirisë në media.
Pas takimit Gjekmarkaj nuk ka hezituar të shprehë diskutimet rreth takimit, nëpërmjet një postimi në rrjetin social facebook.
Ai u shprehet se u ka vënë në dukje problemin që ka qeveria në raportin me mediat. Duke shtuar se edhe shqetësimin për krijimin e agjencisë së mediave që sipas tij rrezikohet të kthehet në një ministri propagandë. “Po ashtu u shpjegova se historikisht në Shqipëri pavarësisht në ka qeverisur e djathta apo e majta problemi kryesor ka qenë qeveria në raport me mediat fjalën dhe lirinë, por asnjëherë si në këto vite lajmi ka funksione kryekëput propagande , ky Kryeministri ka Tv personal dhe po kaq ka miratuar edhe një agjenci e cila rrezikon të shndërrohet në ministri propagande ndonëse ne e kemi një agjenci shtetërore lajmesh ! Lajmet dalin të paketuara e të ambalazhuara siç i do Kryeministri .Gazetaret e kanë të vështirë ta marrin informacionin në burim”, ka shkruar ai.
Po ashtu Gjekmarkaj ka shprehur shqetësimin për kreun e AMA-s si dhe për Ligjin Antishpifje.
“Ligji antishpifje tundet here pas here mbi horizontin mediatik më shumë si kërcënim sesa nevojë për vete rregullim në sfidë të vazhdueshme me nevojat e komunitetit dhe të perspektivave të lirisë. Mora premtimin e Zonjes Ribeiro për një monitorim thelbësor të çështjeve të ngritura dhe e sigurova atë se në cilësinë e Kryetarit të Komisionit parlamentar të edukimit dhe medias si përfaqësues i Opozites shqiptare do të jem dhe do të jemi vigjilent ndaj çdo kërcënimi të lirisë së opinionit dhe nevojave të punëtorëve të saj”, ka shkruar ai.
Deputeti e mbyll shkrimin e tij me një mesazh dhe apel për të gjithë mediat, duke thënë se duhet të angazhohemi në organizatat ndërkombëtare për mbështetjen e të cilave, sipas tij kemi shumë nevojë si arbitrazh bazuar mbi parime demokratike e në këtë mënyrë mediat do të jenë më të lira.
