Juventusi rrezikon një penalizim shembullor të radhës, me pikë të hequra në renditje dhe një gjobë të majme, e cila nis nga 51 mijë euro dhe mund të shkojë deri në 1.5 milionë.
Është kjo ajo që shkruan ditën e djeshme “Gazzetta dello Sport” sipas së cilës prokuroria e Torinos ka gjetur letrën e famshme të Kristiano Ronaldos, ajo që lidhet me 4 pagat e periudhës mars, prill, maj e qershor të 2020-ës, në periudhën e pandemisë, të cilat mesa duket CR7-ës sigurisht që i janë dhënë, por ato nuk janë shënuar në bilanc. Madje, këmbëngulja e prokurorisë së Torinos, e cila duhet konfirmuar, thekson se Juvja nuk ka fshehur vetëm 4 muajt e Ronaldos, por të të gjithë skuadrës, duke i shpëtuar bilancit të sezonit 2019-2020 90 milionë euro, nga të cilat 20 (saktësisht 19.9 milionë euro), i përkisnin vetëm Ronaldos.
Dhe në letrën e famshme, që u bë virale pasi nisi hetimi i plusvalencave në radhët e torinezëve, mesa duket nënvizohet pikërisht pakti mes “Zonjës së Vjetër”, CR7-ës dhe menaxherëve e avokatëve të portugezit, që 4 pagat e pandemisë t’i hidheshin ose me disa këste, ose menjëherë kur ai të vendoste të largohej, siç ndodhi në 27 gusht 2021. Gjithsesi, e gjithë kjo duhet provuar, teksa Juvja këmbëngul se ka punuar brenda rregullave, por nëse rezulton e vërtetë, dënimi me pikë mund të jetë ndoshta edhe dopio, qoftë për këtë sezon, ashtu sikurse të ardhshmin.
Discussion about this post