Gjendet një makinë e djegur, a ka lidhje me vrasjen e Lekstakajt?

Një makinë e djegur është gjetur në Gjadër të Lezhës. Brenda makinës raportohet se është gjetur edhe një armë zjarri.

Nuk dihet nëse ky automjet ka lidhje me vrasjen e ndodhur dje në Balldre ku u ekzekutua Nikolin Marku (Lakstakaj) 42 vjeç.

Policia ka nisur hetimet lidhur me automjetin e djegur, ndërsa arma e zjarrit do ti nënshtrohet ekspertizës.

Pasditen e së martës në Balldre të Lezhës u ekzekutua me armë zjarri Nikolin Lekstakaj, ndërsa policia tha se dyshonte për një vrasje me motive gjakmarrjeje.

Fisi Lekstakaj është në hasmëri me fisin Nikulaj prej 26 vitesh. Tre muaj më parë u ekzekutua në Shëngjin, në lokalin e tij, biznesmeni Ardian Nikulaj. Ai u qëllua nga një portugez, i pajtuar si vrasës me pagesë, ndërsa policia zbardhi ngjarjen, por pa mundur të arrestojë as ekzekutorin, as personat e tjerë të përfshirë në vrasje, si dhe porositësit.

Ndërkohë 3 muaj pas këtij krimi, u vra Nikolin Lekstakaj, i njohur ndryshe me nofkën “Toli”. Pikërisht gjakmarrja mes dy fiseve ka lindur prej viktimës së djeshme.

Një borxh prej 5 mijë lekësh, i marrë pikërisht nga “Toli” në vitin 1997 në një pikë karburanti, u bë shkak për një histori 26-vjeçare gjakmarrjeje mes palëve, me disa viktima.

I fundit që u ekzekutua pikërisht si pasojë e kësaj hasmërie ishte biznesmeni Ardian Nikulaj. Ai u vra në lokalin e tij në Shëngjin të Lezhës më 19 prill. Për këtë ngjarje, autoritetet thonë se porositës ishte Edmond Haxhia, nip i Lekstakajve.

Duket se autorët e kanë shënjestruar prej kohësh Lekstakajn, pasi ky nuk është atentati i parë i ngritur ndaj tij.

Raportohet se Lekstakaj, i kishte shpëtuar një atentati në vitin 2012. Mësohet se një sasi lënde plasëse ishte vendosur në mjetin e tij BMË X5 dhe shpërtheu gjatë lëvizjes, por Lekstakaj nuk pati dëmtime.