Një tjetër trup i pajetë është gjetur gjatë kontrollit shtesë të autobusit që u aksidentua të martën në Bullgari, duke e çuar kështu numrin e viktimave në 45. Sipas mediave bullgare, trupi i pajetë i përket një fëmije.
Gabimi njerëzor është dyshimi kryesor që besohet të ketë shkaktuar aksidentin me autobusin e Maqedoninë së Veriut në një autostradë të Bullgarisë, sipas zv.kryeprokurorit dhe drejtorit të Shërbimit Hetimor Kombëtar në Bullgari, Borislav Sarafov.
“Për momentin pista më e besueshme është ajo e faktorit njerëzor, për të cilin po shqyrtohen kushtet e seksionit ku ka ndodhur aksidenti, si sinjalistika dhe ndriçimi rrugor. Trotuari në të cilin ka goditur shoferi i autobusit është jo vetëm i panevojshëm në vend, por edhe i rrezikshëm. Në vendngjarje nuk pati asnjë shpërthim, por zhurma e fortë që u dëgjua ishte ajo e autobusit që u përplas në trotuar, ndoshta kjo është arsyeja pse autobusi mori flakë”, ka deklaruar Sarafov.
Bullgaria, vend anëtar i BE-së me 6.9 milionë banorë, është përballur me disa aksidente rrugore vdekjeprurëse në vjetët e fundit. Një aksident i ngjashëm ka ndodhur më 2018, kur 17 turistë bullgarë kanë vdekur pas rrëshqitjes dhe rrokullisjes së autobusit, si pasojë e lagështisë.
Discussion about this post