Gjermani/ Stuhitë shkulin pemët dhe çatitë, 30 persona të lënduar

Të paktën 30 persona janë lënduar nga moti i ligë në Kising të Bavarisë, rreth 10 kilometra në jugperëndim të Augsburgut në jug të Gjermanisë.

Stuhia e përcjellë me erëra të forta ka shkatërruar një tendë ku shërbehej birra, ku si pasojë gjashtë persona janë lënduar derisa po tentonin ta mbronin tendën nga erërat e forta.

Ekipet emergjente janë kujdesur për të lënduarit, duke i telefonuar edhe helikopterëve për t’i transportuar për në spital.

Stuhia shkuli edhe pemë në Shvaben, duke dëmtuar edhe ndërtesa e vetura. Autoritetet kanë njoftuar se një grua e moshuar u lëndua kur një pemë përfundoi mbi veturën e saj.

Policia dhe zjarrfikësit kanë intervenuar pasi një tunel ishte mbushur me ujë,  e në aksione të kërkim-shpëtimit kanë marrë pjesë qindra policë, pjesëtarë të ekipeve emergjente dhe zjarrfikës.