Një tren pasagjerësh ka dalë nga shinat këtë të diel në Baden-Württemberg të Gjermanisë, duke shkaktuar disa viktima dhe të plagosur.
I përfshirë në aksident është një tren rajonal Deutsche Bahn Regional Express, që transportonte rreth 100 pasagjerë dhe po udhëtonte nga Sigmaringen për në Ulm.
Mediat vendase raportojnë se aksidenti hekurudhor ndodhi rreth orës 18:10 pranë Zwiefaltendorf, në rrethin e Biberach (Baden-Württemberg). Një zëdhënës i policisë federale në Stuttgart i tha Bild se “dy vagonë të trenit ekspres rajonal Deutsche Bahn kanë dalë nga shinat.”
Edhe sipas agjencisë gjermane e lajmeve (DPA), disa persona kanë vdekur dhe shumë të tjerë u plagosën. Treni rajonal doli nga shinat pranë Riedlingen, pas një stuhie që kishte shkaktuar më parë një rrëshqitje toke në zonë.
Pamjet e para nga vendi tregojnë vagonët e një treni të verdhë dhe të bardhë të shtrirë në një anë në një pjesë të binarit të rrethuar me pemë.
Linja hekurudhore është mbyllur përkohësisht, ndërsa autoritetet po vazhdojnë hetimet për të përcaktuar shkakun e aksidentit. Situata mbetet serioze dhe operacionet e shpëtimit vijojnë.
Discussion about this post