Anëtari i Asamblesë së Përgjithshme të Këshillit të Europës, Knut Abraham, ka deklaruar se qeveria e Gjermanisë ka konfirmuar mbështetjen për anëtarësimin e Kosovës në Këshillin e Europës.
Nëpërmjet një postimi në Twitter, deputeti gjerman ka publikuar edhe një pyetje që i ka bërë qeverisë së Gjermanisë rreth asaj nëse do ta mbështeste Kosovën, nëse kjo e fundit do të aplikonte për anëtarësim në Këshillin e Europës. Si përgjigje, ka shkruar Abraham, qeveria e Gjermanisë ka deklaruar se mbështet një gjë të tillë.
“Qeveria federale mbështet anëtarësimin e Kosovës në Këshill të Europës. Është me rëndësi, që për këtë çështje të mbesim në koordinim të ngushtë me partnerët tanë në BE dhe në Këshill të Europës”, është thënë në përgjigjen e qeverisë së Gjermanisë.
Presidentja Vjosa Osmani ka folur përsa i përket aplikimit të mundshëm të Kosovës për anëtarësim në në Këshillin e Europës e cila është shprehur optimiste për anëtarësimin e vendit por sipas saj nga aplikimi deri në anëtarësim duhet një periudhë kohore.
“… Jemi në fazën e fundit të përgatitjeve për aplikim, por ta keni parasysh se për anëtarësim në Këshillin e Europës, shteteve të ndryshme, iu është dashur kohë e ndryshme për pranim. Dikujt i është dashur 1 vjet e dikujt tjetër 5 vjet për anëtarësim. Ne po punojmë që me partnerët tanë kjo kohë të jetë sa më e shkurt”, ka deklaruar Osmani.
“Siç e dini më shumë se 2/3 e shteteve anëtarë të këshillit të Europës e kanë njohur Pavarësinë e Kosovës dhe ne shpresojmë se këto do të votojnë në favorin tonë”, ka shtuar më tej.
Discussion about this post