Një ngjarje tronditëse është zbuluar në Katania të Italisë, ku një grua 44-vjeçare me origjinë nga Rumania është shpëtuar nga policia, pasi ishte mbajtur peng për rreth një muaj në një banesë nga një 60-vjeçar italian.
Sipas mediave italiane, burri kishte publikuar një njoftim në rrjetet sociale, ku kërkonte një grua për të ndihmuar në punët e shtëpisë. E joshur nga oferta për punë, gruaja kishte kontaktuar me të dhe pas takimit, kishte pranuar të fillonte punën në shtëpinë e tij.
Por gjithçka rezultoi të ishte një kurth. Sapo kishte hyrë në banesën e 60-vjeçarit, ai i kishte marrë telefonin dhe dokumentet, duke e detyruar të qëndronte e mbyllur brenda, pa asnjë mundësi për të komunikuar me botën e jashtme. Gjatë kësaj kohe, ajo është raportuar të ketë qenë viktimë e abuzimeve të përsëritura seksuale.
Shpëtimi i saj erdhi falë një denoncimi anonim dhe një ndërhyrjeje të menjëhershme të forcave të rendit, të cilat gjetën 44-vjeçaren në një gjendje të rënduar psikologjike dhe fizike. Autori është arrestuar dhe po përballet me akuza të rënda për rrëmbim personi, dhunë seksuale dhe shkelje të të drejtave themelore të njeriut.
Ngjarja ka shkaktuar reagime të forta në Itali dhe më gjerë, duke ngritur shqetësime mbi sigurinë e grave migrante dhe rreziqet që lidhen me ofertat e rreme të punës në internet. Autoritetet kanë bërë thirrje për kujdes maksimal ndaj rasteve të tilla dhe denoncimin e çdo situate të dyshimtë.
Discussion about this post