Sekretari i Përgjithshëm i PS, Damian Gjiknuri ka reaguar pas akuzave të demokratit Gazment Bardhi për udhëtimet jashtë Shqipërie me personat që janë të lidhur me aferën e inceneratorëve.
Gjiknuri thekson se ka autorizuar dorëzimin e padisë për shpifje ndaj Bardhit. Ai bën me dije se iu drejtua zyrtarisht autoriteteve përgjegjëse dhe nga 17 datat e pretenduara nga PD si lëvizje të tijat jashtë vendit, sipas sistemit TIMS 14 rezultojnë të pavërteta.
“Shpërthimet e pakontrolluara të Gazit të Lulit faktojnë situatën e emergjencës dhe panikut që ka përfshirë lidershipin zyrtar të Partisë Demokratike. Efektin ndotës të të tillë Gazrave nuk ka incenerator as impiant që ta marrë përsipër ta trajtojë. Për të gjitha deklarimet e djeshme, të përsëritura dhe ditën e sotme, kam autorizuar dorëzimin e padisë për shpifje ndaj Gazit të Lulit. Për hir të transparencës ndaj opinionit publik, ju drejtova zyrtarisht autoriteteve përgjegjëse dhe nga 17 datat e pretenduara nga PD si lëvizje të miat jashtë vendit, sipas sistemit TIMS 14 rezultojnë të pavërteta. Tre data që përkojnë me udhëtime të miat janë krejt rastësore e pa asnjë lidhje me personat në fjale: përkatësisht dy janë vizita zyrtare në detyrën e ministrit dhe një udhëtim me automjet me familjen time. Asnjë udhëtim charter. Të gjitha në linjat e zakonshme të fluturimit”, tha ai.
Mes të tjerash Gjiknuri i kërkon Bardhit të bëjë gati heqjen dorë nga mandati si shenjë reflektimi.
“Nën presionin e “Foltores”, duket qartë se Gazi i Lulit dhe Luli i Gazit e kanë nxjerrë në shitje partinë si shpifës me pagesë, gjobëvënës ekonomik e politik, duke ju vetofruar blerësit më të parë. Gaztori i Lulit të gjejë avokatin dhe bëjë gati mbrojtjen në gjykatë! Siç e sfidova dje publikisht në Kuvend, hapi i dytë, të bëjë gati heqjen dorë nga mandati si shenjë reflektimi për budalliqet me pagesë që nxjerr nga goja”, shkruan ai.
Kujtojmë se në ditët e fundit vazhdimisht PD ka publikuar akuzua të forta ndaj Gjiknurit, ndërsa mëngjesin e sotëm Bardhi i bëri thirrje institucioneve të drejtësisë të veprojnë.
