Prej disa ditësh Komisioni Hetimor për Inceneratorët po vazhdon intesivisht punën për të zbardhur të vërtetat rreth aferave të shumë përfolura. Në mbledhjen e sotme, kryetarja e Komisioni, Jorida Tabaku, ka përmendur si pjesë të tyre edhe deputetin socialist Damian Gjiknuri, sigurisht bashkë me të Erion Veliajn dhe pushtetarë të tjerë.
Nuk kanë kaluar shumë orë dhe ka ardhur menjëherë reagimi i Gjiknurit. Përmes një postimi në Facebook , Gjiknuri shprehet se Tabaku ka gënjyer kur ka deklaruar se ai kishte firmosur kontratën e inceneratorit të Tiranës. Sipas tij, Tabaku ka mashtrua sërish duke thënë se ai ka firmosur koncesion të posaçëm për shitje energjie inceneratorit të Elbasanit për 25 vjet.
“Keqardhje për deklarimet tashmë të përsëritura dhe krejt spekulative të zonjës Tabaku. Duket se “lëkundjet tektonike” brenda PD-së midis grupeve “grata” dhe “non grata” e kanë bërë dhe Tabakun të humbasë lidhjen me realitetin. Fillimisht gënjeu publikisht kur tha se kisha firmosur kontratën e inceneratorit të Tiranës. E konsiderova një lajthitje në kushtet e mungesës së informacionit dhe nuk replikova me zonjën në kohën kur lëshoi një sajesë të tillë. Kontratat janë publike dhe çdokush mund ta shohë që nuk është firmosur asnjëra prej meje. Sot, Tabaku vijoi me të tjera shashka teksa deklaroi se paskam firmosur koncesion të posaçëm për shitje energjie inceneratorit të Elbasanit për 25 vjet. Sërish mashtrim”, shkruan ai.
Me këtë deklaratë Gjiknuri mohon totalisht që të ketë firmosur për këto kontrata, madje shprehet se mund ta faktojë shumë lehtë që ai nuk ka hedhur asnjë firmë. Kjo deklaratë e tij tregon se të gjithë po tërhiqen një nga një, duke lënë Veliajn të vetëm përball kësaj gjullurdie që kanë përfituar miliona lekë.
Discussion about this post