Një ngjarje e rëndë ka ndodhur të hënën, gjatë orëve mësimore në gjimnazin “Ahmet Gashi”, në Prishtinë. Një nxënës ka therur me mjet të mprehtë shokun e klasës gjatë orës së kimisë, ku nuk ishte i pranishëm profesori.
Ai, sipas burimeve, kishte shkuar në një klasë tjetër për të zëvendësuar profesorin që mungonte. Burimet bëjnë të ditur se therja u krye me thikë, mirëpo drejtori i shkollës, Haxhi Metaj, thotë se ajo u krye me laps kimik.
“Nuk ishte thikë, ishte me laps kimik, nuk ishte lëndim i rëndë”, tha Metaj.
Policia e kontaktuar nga KOHA, shprehet se nuk ishte në dijeni për rastin, megjithatë burimet thonë se është parë një patrullë.
“Të shohim nesër, do të flasim me prindër, por nuk ishte lëndim i rëndë”, tha Metaj.
Burimet konfirmojnë se nxënësit plaga iu shkaktua në kokë dhe se ai mori ndihmën e parë nga autoambulanca.
Discussion about this post